Jánibek Álimhanuly bos tıtýl úshin Eskıva Falkaomen judyryqtasýy múmkin

NUR-SULTAN. QazAqparat - Inside the Ropes basylymy qazaqstandyq boksshy Jánibek Álimhanulynyń (11-0, 7 KO) álem chempıony ataǵy úshin jekpe-jegine túsinikteme berdi dep habarlaıdy QazAqparat Sports.kz-ke silteme jasap.

«Eger múmkin bolsa, Jánibek Álimhanulynyń kelesi jyly orta salmaqtaǵy WBO tujyrymy boıynsha bos tıtýl úshin Eskıva Falkaomen judyryqtasýyn kóre alamyz. Bul birtúrli, qyzyqty jekpe-jek», dep jazylǵan Inside The Ropes-tiń Twitter-degi paraqshasynda.

Eskıva Falkao (29-0, 20 KO) kásipqoı retinde áli tıtýldyq jekpe-jek ótkizgen joq. Orta salmaqtaǵy WBO tujyrymy boıynsha qazirgi álem chempıony ataǵyna keletin bolsaq, ol amerıkalyq boksshy Demetrıýs Andrade (31-0, 19 KO), al Jánibek Álimhanuly — onyń mindetti úmitkeri. Alaıda, kóp uzamaı Andrade ortasha salmaqqa kóterilse, onyń belbeýi bos bolady.

WBO nusqasy boıynsha álem chempıony Demetrıýs Andrade qazaqstandyq Jánibek Álimhanulymen aıqasqa shyǵýdan bas tartsa, Dúnıejúzilik boks uıymynyń tarapynan sanktsııa salynýy múmkin.