Jánibek Álimhanuly bolashaǵy zor boksshy - Nelson Lopes
ASTANA. QazAqparat - Kásipqoı boksshy Qanat Islamnyń promoýteri Nelson Lopes Jánibek Álimhanulynyń daıyndyǵy kem túspese, aldaǵy 4-5 jylda «juldyzdy» boksshylardyń qatarynan kórinetinin málim etti, dep habarlaıdy «QazAqparat» HAA tilshisi.
«Meniń oıymsha, Jánibek Álimhanuly qatelikke boı aldyrmaıtyn boksshy. Bıik dárejege jetýge daıyn. Eń bastysy ózin-ózi damytýǵa ýaqyty bar», - deıdi Nelson Lopes.
Buǵan deıin Jánibektiń 9 qyrkúıekte brazılııalyq Karmelıto de Jezýspen qolǵap túıistiretini belgili bolǵan edi. Brazılııalyq boksshy kásipqoı rıngte 23 kezdesý ótkizip, 18-inde jeńiske jetken. Sondaı-aq ol 15 jekpe-jeginde ýaqytynan buryn jeńiske jetip, 5 kezdesýde jeńilgen.
Sońǵy jekpe-jekte jaraqat alyp qalǵan Jánibektiń aldaǵy kezdesýge saq bolýy kerek pe degen suraqqa Nelson Lopes bári oıdaǵydaı bolatyndyǵyn aıtty.
«Joq. Ýaıymdaýdyń esh retin kórip turǵan joqpyn. Daıyndyǵyn baıqadym. Eshqandaı másele kórip turǵan joqpyn», - dedi promoýter.
Eske sala ketsek, 9 qyrkúıekte Astanadaǵy «Saryarqa» velotreginde Qanat Islam kanadalyq Brendon Kýkpen qolǵap túıistirmek. Kezdesýdiń anderkartynda Jánibek Álimhanuly (1-0, 1KO) kásipqoı bokstaǵy ekinshi kezdesýin ótkizedi.
