Jánibek Álimhanuly álem chempıony ataǵyna qatysty pikir bildirdi

NUR-SULTAN. QazAqparat – Orta salmaqtaǵy ýaqytsha álem chempıony qazaqstandyq Jánibek Álimhanuly Twitter jelisinde tolyqqandy álem chempıony mártebesi týraly málimdeme jasady, dep habarlaıdy QazAqparat.

Qazaqstandyq boksshy áleýmettik jelidegi paraqshasynda óziniń Dúnıejúzilik boks qaýymdastyǵy (WBO) nusqasy boıynsha tolyqqandy álem chempıony dep tanylǵany týraly habardan keıin:

«Resmı jańalyqty kútemiz» dep jazdy.

Insaıder Rık Gleızer búgin Álimhanulynyń tolyqqandy chempıon atanǵanyn habarlady. Aıta keteıik, buǵan deıin tolyqqandy álem chempıony bolǵan amerıkandyq boksshy Demetrıýs Andrade qazaqstandyqpen tıtýldyq jekpe-jekten bas tartyp, ekinshi orta salmaq dárejesine ótkeni aıtylýda.

Eske salaıyq, qazir Jánibek Álimhanuly WBO tujyrymy boıynsha orta salmaqtaǵy «ýaqytsha» álem chempıony.

Foto: instagram.com/janibek_alimkhanuly