Jánibek Álimhanuly aldaǵy jekpe-jeginde birden eki tıtýl úshin aıqasady

NUR-SULTAN. QazAqparat - Qazaqstandyq Jánibek Álimhanuly óziniń altynshy jekpe-jeginde birden eki tıtýl úshin aıqasatyn bolady, dep habarlaıdy «QazAqparat» HAA tilshisi Qazaqstan boks federatsııasyna silteme jasap.

Orta salmaqtaǵy WBO Global jáneWBC Continental Americas ataqtary úshin shaıqas 12 sáýir kúni Los-Anjeleste ótedi. J.Álimhanulynyń qarsylasy meksıkalyq Krıstıan Olıvas bolmaqshy, ol úshin bul jekpe-jek sporttyq mansabyndaǵy 21-shi aıqas. Al J. Álimhanuly kásibı rıngke altynshy ret shyqpaqshy.

Buǵan amerıkalyq menedjer Egıs Klımas óz tańdanysyn bildirdi.

«Altynshy jekpe-jeginde-aq WBO Global jáne WBC Continental Americas tıtýldary úshin aıqasqa túsetin Jánibek Álimhanulyn maqtan tutamyn», - dep jazdy ol óziniń Instagramdaǵy paraqshasynda.

Jekpe-jekti 12 sáýir kúni Qazsport telearnasynan tikeleı efır arqyly kórýge bolady. Bastalýy Nur-Sultan ýaqyty boıynsha saǵat 07:00-de.