Jańǵyrýdyń negizgi kúshi jáne Jańa Qazaqstannyń jańarý kózi - jastar – Senat tóraǵasy

NUR-SULTAN. QazAqparat – Konstıtýtsııaǵa engiziletin ózgerister ár azamatqa óz áleýetin iske asyrý úshin múmkindik berýdi kózdeıdi. Bul týraly Senat tóraǵasy Máýlen Áshimbaev málim etti, dep habarlaıdy QazAqparat tilshisi.

«Búgin jastar saıasatyna qatysty máseleni talqylaý úshin jınalyp otyrmyz. Bul qazirgi tańda elimiz úshin basym baǵyttardyń biri ekeni sózsiz. Prezıdent Qasym-Jomart Toqaevtyń bastamasymen keshendi saıası ózgerister men konstıtýtsııalyq reforma qolǵa alyndy. Onyń bári demokratııalyq-áleýmettik jáne ádiletti memleket qurý úshin qabyldanyp jatqan sharalar. Konstıtýtsııamyzǵa engiziletin mańyzdy ózgerister halyqtyń tańdaýyna berilip, referendýmǵa shyǵarylyp otyr. Bul ózgerister qazaqstandyqtardyń ómirin jaqsartýdy, básekelestikke qajetti jaǵdaı jasaýdy jáne ár azamatqa óz áleýetin iske asyrý úshin múmkindik berýdi kózdeıdi», - dedi M. Áshimbaev Senattaǵy «Jańa Qazaqstan: jastar jáne jańǵyrý» taqyrybyndaǵy parlamenttik tyńdaý kezinde.

Osy rette ol jańǵyrýdyń negizgi kúshi jáne Jańa Qazaqstannyń jańarý kózi jastar ekenin atap ótti.

«Sondyqtan reformanyń túpki maqsaty da jastardyń ál-aýqatyn arttyrýǵa ári olardyń damýyna jaǵdaı jasaýǵa arnalǵan. Búginde Qazaqstanda 4 mln-ǵa jýyq jas bar. ıAǵnı bul elimizdiń árbir besinshi turǵyny jas azamat degen sóz. 2000-shy jyldardyń ortasynda jáne ekinshi jartysynda elimizde bala týý kórsetkishi kúrt ósti. Sondyqtan qazir jastardyń sany únemi ósip otyratyny túsinikti. Bul úrdis 2030 jylǵa qaraı óz shyńyna jetedi dep boljanyp otyr. Árıne, munyń artyqshylyqtary óte kóp», - dedi Senat tóraǵasy.