Jańǵyrtýdan keıin «Almaty» telearnasynyń aýdıtorııasy 26% ulǵaıǵan
ASTANA. QazAqparat - «Almaty» telearnasy rebrendıngten keıingi bir jarym jyl ishinde tolyq tehnıkalyq jańǵyrtýdan ótti, dep habarlady telearnanyń damý boıynsha burynǵy dırektory Jandos Qurmanbaev.
«2016 jyly Almaty boıynsha aýdıtorııanyń qamtylýy 26% artqan. Tehnıkalyq ený kólemi keńeıtildi: 14 oblys ortalyǵyna jáne Almaty men Astanaǵa tsıfrlyq jerústi habar taratýdy bastady (bizge deıin spýtnıktik habar taratý ǵana bolǵan), eldegi barlyq kabeldik jelilerge - Qazaqstannyń 35 qalasyndaǵy 65 operatorǵa endi onlaın habar taratý iske qosyldy», - dep jazdy Qurmanbaev óziniń Facebook paraqshasyna.
Onyń aıtýynsha, telearna oń qarjylyq kórsetkishterge qol jetkizdi. Telearnanyń óz tabysy 26% ulǵaıǵan.
«Memlekettik aqparattyq tapsyrystan túsken qarajattan bólek, jańa komanda jarnama berýshilerden 264 mıllıon teńge túsirgen. Ótken jyly jarnama naryǵynyń 30% qysqarǵanyn eskersek, muny úlken jetistik dep baǵalaýǵa bolady», - dep atap ótti ol.
Telearna aldyńǵy qatarly túsirilim jáne habar taratý quraldarymen jabdyqtalǵan, jalpy aýmaǵy 625 sharshy shaqyrym bolatyn jańa úsh aımaqty stýdııalyq pavılon qurylysyn aıaqtady.
«Sońǵy shyqqan júıelik kameralar, júzden astam jaryq qurylǵylary, efırlik apparat, apparattyq-stýdııalyq keshen, montaj stansalary. Stýdııalyq dekoratsııalar dızaınyn jobalaýdy aıaqtadyq. Bul óte jańa jáne qazaqstandyq kórermenderge beıtanys bolmaq (bir baǵdarlama júrip jatqanda kórermen kórshi stýdııadaǵy qozǵalystardy kórip otyrady). Jaqyn kúnderi stýdııa paıdalanýǵa beriledi», - dep Qurmanbaev telearna jetistikteri týraly aıtyp berdi.
Odan bólek, telearnanyń barlyq óndiristik protsessi avtomattandyrylǵan jáne HD-qalypqa aýystyrylǵan.
