Jańǵyrtý saıasatyn jetildirý kezeń-kezeńimen júzege asyrylady - Elbasy

ASTANA. QazAqparat - Búgin Aqordada Elbasy Nursultan Nazarbaev Jańǵyrtý jónindegi ulttyq komıssııa qyzmetiniń aralyq qorytyndylaryna arnalǵan keńes ótkizdi. Keńes barysynda kásibı memlekettik apparatty qalyptastyrý, zań ústemdigin jáne eldiń ekonomıkalyq ósimin qamtamasyz etý máseleleri talqylandy.

Keńes barysynda Elbasy Nursultan Nazarbaev búgingi kúni halyqpen saýatty jumys isteýdi qalyptastyrýǵa erekshe nazar aýdarý qajettigin atap ótti.

«Jańa zańnamalyq aktiler qabyldaý nátıjesinde keıbir kemshilikter men olqylyqtarǵa jol berilip jatyr. Buǵan jer máselesine qatysty zań aıqyn mysal bola alady. Sondyqtan da, júıeli taldaý men qabyldanatyn sharalardy jan-jaqty talqylaý negizinde qateliktermen udaıy jumys isteý qajet. Biz saıasatymyzdy jetildirýge baǵyttalǵan qadamdardy kezeń-kezeńimen júzege asyrýǵa tıispiz», - dedi Memleket basshysy.

Keńes otyrysyna QR Premer-Mınıstri Kárim Másimov, QR Prezıdenti Ákimshiliginiń Basshysy Nurlan Nyǵmatýlın, QR Premer-Mınıstriniń orynbasary Darıǵa Nazarbaeva, Prezıdent Ákimshiligi Basshysynyń orynbasary Baǵlan Maılybaev, Prezıdent Ákimshiligi basshysynyń orynbasary Marat Beketaev, Joǵarǵy Sot Keńesiniń tóraǵasy Anatolıı Smolın, QR Prezıdentiniń kómekshisi Álıhan Smaıylov, Memlekettik qyzmet isteri mınıstri Talǵat Donaqov, Investıtsııa jáne damý mınıstri Áset Isekeshev, Ulttyq ekonomıka mınıstri Qýandyq Bıshimbaev, Bilim jáne ǵylym mınıstri Erlan Saǵadıev, Astana qalasynyń ákimi Ádilbek Jaqsybekov qatysty.