Jańǵyrtýdan keıin Almaty-1 jáne Almaty-2 vokzaldary qalaı ózgeredi
ALMATY. KAZINFORM — Almatyda megapolıstiń temirjol toraptaryn jańǵyrtý jumystary qalaı júrip jatyr? Kazinform tilshisi anyqtap kórdi.
«Qazaqstan temir joly» kompanııasynyń málimetinshe, temirjol nysandaryn rekonstrýktsııalaý olardy zamanaýı standarttarǵa beıimdeýge baǵyttalǵan. Qazir Almaty-1 vokzalynda qurylys jumystary qarqyn alǵan.
— Araldyq perron boıynsha qurylys-montajdaý jumystary aıaqtaldy. Ǵımarattyń qańqasyn kúsheıtý, shatyr jabý, syrtqy jáne ishki árleý, syrtqy jáne ishki sý qubyry, káriz, elektrmen jabdyqtaý ınjenerlik jelileri boıynsha jumystar júrgizilip jatyr, — dep habarlady QTJ.
Al tarıhı-mádenı eskertkishter tizimine engen Almaty-2 vokzalynda jumystar áli bastalmaǵan. Joba restavratsııalaý normalarynyń qatań saqtalýyn talap etedi.
— Jobalaý-izdestirý jumystary boıynsha «Qazqaıtajańartýdyń» ǵylymı-jobalaý qujattamasy ázirlendi, qurylys-montajdaý jumystaryna aldaǵy ýaqytta bastalady, — delingen jaýapta.
Sonymen qatar QTJ Almaty-1 jáne Almaty-2 vokzaldarynyń alańdaryn úlkeıtý jobada qarastyrylmaǵanyn atap ótti. Ǵımarattardyń arhıtektýralyq ólshemderi burynǵy qalypta qalady.
Jóndeýden keıin vokzaldar qandaı bolady
Ulttyq kompanııa jańǵyrtý jumystarynan keıin Almaty-1 jáne Almaty-2 vokzaldaryndaǵy jolaýshylarǵa qyzmet kórsetý deńgeıin jaqsaratynyn atap ótti.
Sebebi joba aıasynda kelesi mindetter kózdelgen:
* Kútý zaldaryn jańartý;
* Navıgatsııany jaqsartý;
* Múgedektigi bar jandar úshin qoljetimdilikti arttyrý;
* Sanıtarlyq toraptardy jańǵyrtý;
* Zamanaýı tsıfrlyq servısterdi engizý;
* Nysandardyń qaýipsizdik deńgeıin arttyrý.
— Vokzaldardy jańǵyrtý ınjenerlik júıelerdi jańartýǵa jáne barynsha jaıly, qaýipsiz ári qoljetimdi orta quryp, jolaýshylarǵa qyzmet kórsetý deńgeıin aıtarlyqtaı arttyrýǵa múmkindik beredi, — dep habarlady kompanııadan.
QTJ qaladaǵy negizgi temirjol ortalyqtarynyń zańdyq mártebesin de naqtylady. 2025 jylǵy 16 shildeden bastap Almaty-1 jáne Almaty-2 vokzaldary resmı túrde «Qazaqstan temir jolynyń» senimgerlik basqarýyna qabyldanǵan.
Ulttyq kompanııa jóndeý jumystary aıaqtalǵannan keıin basqarý nysanyn ózgertýdi josparlap otyrǵan joq.
— Vokzaldardy Almaty ákimdigine qaıtarý josparlanbaǵan, — dep atap ótti kompanııadan.
Eske salaıyq, 2019 jyly Almaty-1 jáne Almaty-2 temirjol vokzaldary qalanyń kommýnaldyq menshigine ótti.
2023 jyly Almatynyń eks-ákimi Erbolat Dosaev temirjol vokzaldary «Qazaqstan temir joly» ulttyq kompanııasyna qaıtarylatyny týraly málimdedi.
Keıin vokzaldar «Qazaqstan temir joly» ulttyq kompanııasyna senimgerlik basqarýǵa berildi.
