Jańǵyrtý jumystaryn aıaqtamaǵan bazar ıeleri ákimshilik jaýapkershilikke tartylady
ASTANA. KAZINFORM – 2026 jyldyń 1 qańtarynan bastap jańǵyrtý jumystaryn aıaqtamaǵan bazar ıeleri ákimshilik jaýapkershilikke tartylady. Bul týraly Saýda jáne ıntegratsııa mınıstrligi Saýda komıteti tóraǵasynyń orynbasary Ernur Jáýtikbaev aıtty.
- Zańnama talaptaryna sáıkes, 2026 jyldyń 1 qańtarynan bastap jańǵyrtý jumystaryn aıaqtamaǵan bazarlardyń ıelerine qatysty ákimshilik jaýapkershilik qarastyrylǵan. Al talaptar oryndalmaǵan jaǵdaıda saýda bazarlarynyń qyzmetin ýaqytsha toqtatý nemese keıinnen tolyq jabý týraly materıaldar sotqa joldanatyn bolady,- dedi ol Ortalyq kommýnıkatsııalar qyzmetindegi brıfıngte.
Onyń aıtýynsha, mınıstrliktiń bazarlar qyzmetin quqyqtyq retteý bóliginde saýda qyzmetteriniń ulttyq standarttaryn ázirlep, engizdi. Sanıtarlyq, órtke qarsy, qala qurylysy, sondaı-aq satyp alýshylar men kásipkerler úshin qaýipsizdik pen jaılylyq talaptary sııaqty barlyq protseske biryńǵaı talaptar qoıyldy. Іshki saýda jáne saýda bazarlary qyzmetiniń erejeleri jetildirildi. Jańa redaktsııada standarttar men normalardy saqtaý mindettiligin, bazar reglamentterin bekitý tártibin, ákimshilerge qoıylatyn talaptardy jáne jaldaý sharttaryn jasasýdyń biryńǵaı tártibi bekitildi. Zańnamanyń saqtalýyna jáne ákimshilik yqpal etý sharalaryna baqylaý kúsheıtildi. Táýekelderdi baǵalaý krıterııleri men tekserý paraqtary qaıta qaraldy.
- Bazarlarǵa 11 jańa talap qosyldy. Bul tekserýlerdiń tıimdiligin arttyrady. Bazar ákimshileriniń teń qoljetimdilikti buzǵany, jaldaý shartyn jasasýdan bas tartqany, ýaqtyly jańǵyrtpaǵany úshin ákimshilik jaýapkershilik bar. Sondaı-aq zańsyz jumys isteıtin bazarlardyń qyzmetin toqtata turý týraly ótinishpen sotqa talap qoıý múmkindigi kózdelgen.
Osylaısha, mınıstrlik barlyq qajetti quqyqtyq tetikti pysyqtap, bazarlardy jańǵyrtý úshin quraldar berdi. Alaıda saýda bazarlaryn jańǵyrtý protsesi jergilikti atqarýshy organnyń, ıaǵnı ákimdikterdiń belsendi qyzmeti men bıznestiń áleýmettik jaýapkershiligine de baılanysty ekenin eskergen jón, - dedi Ernur Jáýtikbaev.
Buǵan deıin Saýda mınıstrligi 2029 jylǵa qaraı saýdanyń zamanaýı formattarynyń úlesin 70 paıyzǵa jetkizýdi josparlap otyrǵanyn jazǵan edik.