Jańǵyryq: Prezıdent TRK qıyndyqqa moıymaǵan jannyń qıly taǵdyry týraly fılm túsirdi
ASTANA. KAZINFORM – QR Prezıdentiniń teleradıokesheni túsirgen «Jańǵyryq» vertıkaldy fılmi kórermenge jol tartty. Týyndy «Qanattylar» teatrynyń aktrısasy, qaısar jan Gúlnardyń taǵdyry jaıynda syr shertedi.
Aıta keterligi, bul – elimizde vertıkaldy formatta túsirilgen ekinshi derekti fılm. Alǵashqysy semeılik palýan qyz Zarına Sarıpovanyń sporttyq jolyna arnalǵan edi.
- Astanada «Dúnıejúzilik kóshpendiler oıyny» ótken kezde Zarına Sarıpova qaryndasymyz týraly «Palýan qyz» degen derekti fılmdi alǵash ret vertıkaldy formatta túsirgen edik. Semeıge arnaıy baryp, palýan qyzdyń «Kóshpendiler oıynyna» daıyndyǵynan bastap, chempıon bolǵanyna deıingi sporttaǵy jolyn taspaladyq. Vertıkaldy fılmder halyqqa ótimdi, ıaǵnı suranys joǵary bola bastady, - deıdi QR Prezıdenti teleradıokesheni Derekti kıno ortalyǵynyń bas prodıýseri Ádilbek Qulaman.
Derekti kıno ortalyǵy Prezıdenttiń bastamalaryna, óńirlerge, shetelderge saparlaryna basymdyq beredi. Sondaı-aq Memleket basshysynyń múgedektigi bar jandardyń quqyqtaryn qorǵaý jáne ómir sapasyn jaqsartý, «Jumysshy mamandyqtar jyly» aıasynda qarapaıym eńbek adamdaryna aıryqsha nazar aýdar týraly tapsyrmalaryn eskere otyryp, mundaı jandardy qoǵamǵa tanystyrý isine de kóńil bóledi.
«Jańǵyryq» derekti fılminiń rejısseri Baqtııar Qanafın keıipkeriniń – Gúlnar syndy adamdardyń qoǵamnan oqshaýlanyp qalatynyn aıtady.
- Keıipkerdi burynnan tanıtynmyn. Qulaǵy nashar estıtin adamnyń teatrda aktrısa bolýy qatty qyzyqtyrdy. Sondyqtan qoıylymdaryna baryp tamashalap, keıipkerge taǵdyry jaıly derekti fılm túsirýge usynys jasadym. Ol birden kelisti. Alaıda, onyń ata-anasy bastapqyda qarsylyq tanytty. Biraq, túptep kelgende túsirilimge kelisimin berdi, - dedi ol.
Memleket basshysy Qasym-Jomart Toqaev osy jyldyń naýryz aıynda Býrabaıda ótken Ulttyq quryltaıdyń IV otyrysynda aımaqtyq teatrlardyń jaı-kúıi týraly másele kóterip, jergilikti bıznes ókilderin teatrlarǵa qoldaý kórsetýge shaqyrǵan edi. Al «Jańǵyryq» derekti fılminiń keıipkeri – elordadaǵy «Qanattylar» teatrynyń aktrısasy.
- Túsirilim barysynda Gúlnardyń otbasyndaǵy 5 balanyń biri ekenin, ápkesi ekeýi qulaqtarynda múkistik bolǵannan keıin apparatpen ǵana estıtinin bildik. Anasymen suhbat barysynda ol qyzdarynyń týǵan kezde qulaqtarynyń múkisi bar ekenin bilmegenin aıtady. Qyzdar 4-5 jasqa kelgende ǵana ańǵarypty, - dedi Baqtııar Qanaev.
Gúlnardyń ata-anasy qyzdarynyń sańyraý ekendigin týa bitkende bilip, tili shyqqanda birden apparat kıgizgende, adamdarmen emin-erkin sóılesip júrer me edi. Ol qazir ata-anasymen, dos-jaranymen, áriptesterimen sóıleskenimen, beıtanys adamdarmen tildesýge yńǵaısyzdanady. Olarmen ymdap sóılesýge tyrysady.
- Sańyraý jandar isteı alatyn jumys túri sanaýly-aq. Jigitter jıhaz qurastyrý, kólik jóndeý, aıaq kıim tigý isimen ǵana aınalyssa, qyzdar tiginshi sııaqty mamandyqqa barady. Al Gúlnar kishkentaıynan model, aktrısa bolýdy armandaǵan. Sol armanyna birtindep qol jetkizip keledi. Endi tiginshilik ónerin damytyp, sol kıimderin kıip, sán úlgilerin kórsetpek nıette. Sol jolda tabandy eńbek etip júr. Ol – uıań, tuıyq. Biraq, aldyna qoıǵan armanyna jetýge degen qulshynysy, tabandylyǵy tańqalarlyq, - deıdi Ádilbek Qazbekuly.
Derekti kıno ortalyǵy aldaǵy ýaqytta da eńbek adamdary, taǵdyry erekshe jandar sııaqty keıipkerler jaıly túsirilimderin jalǵastyrady.
«Jańǵyryq» derekti fılmin myna silteme arqyly kóre alasyzdar.