Jangeldındegi bir otbasynyń ólimi: Aqbaıan Muqanǵalıeva tergeý kezinde ne aıtty
ATYRAÝ.KAZINFORM – Tórt adamnyń ólimine qatysty qylmystyq is boıynsha sotta jańa beınejazbalar kórsetildi. Kadrlarda kúdikti Sultan Sarsemalıevtiń áıeli Aqbaıan Muqanǵalıevanyń tergeý kezindegi jaýaby men erli-zaıyptylardyń shekaradan ótken sáti kórinis tapqan.
«Ata-anam aýylda». «Keshe aǵam Naýryzben sóılestim». «Týǵan jerim – Qyzylqoǵa aýdany, Jangeldın aýyly». «Bilimim – orta». «Sońǵy turǵan jerim – Munaıshy yqshamaýdany». Mundaı aqparatty kúdikti Sultan Sarsemalıevtiń áıeli, marqumdardyń jaqyny Aqbaıan Muqanǵalıeva Atyraýǵa jetkizilgen kezde tergeý barysynda aıtqan.
Degenmen ol naqty mekenjaıyna, elge qashan oralǵanyna, tergeýdiń qaı kúni ótip jatqanyna qatysty suraqtarǵa jaýap bere almady.
- Tergeýdi ári qaraı jalǵastyrýǵa múmkindik joq. Sebebi, aqparattyq júıe boıynsha bul azamat psıhıatrlyq dıspanserdiń esebinde turǵany naqtylandy,-degen tergeý kezinde tergeýshi.
Bul dıalog kezekti sot otyrysynda kórsetildi. Vıdeolardyń arasynda Sultan Sarsemalıev pen Aqbaıan Muqanǵalıevanyń qaladaǵy «Munaıshy» yqshamaýdanynda jaldap turǵan úı mańyn tekserý kezi de bar. Atalǵan vıdeodan úıge jaqyn aýmaqta, temirjol boıynsha qamystardyń arasynda jatqan er adamnyń kıimderi, qan daqtary bar kilem men Sultan Sarsemalıev pen Aqbaıan Muqanǵalıevanyń neke jáne balalarynyń týý týraly kýálikteriniń kóshirmesi, kishkentaılardyń densaýlyq jaǵdaılary týraly anyqtamalar salynǵan sómke tabyldy.
Vıdeolardyń qaraý kezinde ótken jyldyń 9 jeltoqsanynda keshkilik ýaqytta kúdikti men Aqbaıan Muqanǵalıevanyń Qaplanbek ótkizý beketi arqyly shekaradan ótip ketkeni belgili boldy.
Buǵan deıin sotta kúdiktiniń enesiniń altyndaryn lombardqa ótkizgen kórsetildi.
Jangeldın aýylynda baqtashy marqumdardyń malyn kúnine 3 myń teńgege baqqan.
Ótken sot otyrystarynyń birinde Atyraý qalasynda eki múrde tabylǵan úıdiń ıesine jaldaý aqysy beıtanys adamnan túsip otyrǵany belgili boldy.
Jalpy sotqa deıingi tergeý kezinde kúdiktiniń 2 advokaty bolǵan. Qazir Sultan Sarsemalıevti bireýi qorǵap jatyr. Advokat Asan Jumabaev sottalýshyny qazir kináli dep aıtýǵa erte ekenin málimdegen edi.
Kúdikti 2024 jyly kásipkerlik nysandardyń birine jaldamaly jumysshy bolyp, jer qazyp, qoqys shyǵarǵan. Sultan men jumys bergen kásipker bir yqshamaýdanda turǵan. Ara tura bir-birin kórgennen keıin aǵa-ini bolyp aralasqan. Kýá sol kezde Sultan Sarsemalıevtiń qara jumysqa ıkemdi, qoly mashyqtanǵan, jerdi jalǵyz ózi qazatyn qaıratty ekenin aıtqan.
Buǵan deıin negizgi sot otyrysynda aıyptalýshy Sultan Sársemalıev sotta qaıynaǵasy Naýryz Muqanǵalıevti qasaqana emes, ózin-ózi qorǵaý maqsatynda óltirgenin málimdedi.
Qylmystyq iske Atyraý oblysynyń qylmystyq ister jónindegi mamandandyrylǵan aýdanaralyq sotynyń sýdıasy Zarema Hamıdýllına tórelik etýde.
18 mamyr kúni aldyn ala sot otyrysy ótti.
Sol kezde Sultan Sarsemalıev isti alqa bılerge berýden bas tartty.
Sot otyrysy kezinde memlekettik aıyptaýshy da, aıyptalýshy da qylmysqa otbasylyq janjal sebep bolǵanyn aıtty.
Kúdiktige qatysty QR Qylmystyq kodeksiniń 99-baby 2-bóliginiń 1-tarmaǵyna sáıkes (eki jáne odan da kóp adamdy óltirý), sondaı-aq mal satý, kartalardy jymqyrý derekteri boıynsha osy kodekstiń 188 jáne 190 baptary aıasynda qylmystyq is qozǵalǵan edi.
Tergeý barysynda Sultan Sarsemalıev Naýryz Muqanǵalıevti mamyr aıynda ózi qalada jalǵa alǵan úıinde óltirip, úı irgesine kómip tastaǵany belgili bolǵan.
Al qarasha aıynda kúdikti bir pyshaqpen úsh adamdy óltirgen. Jangeldın aýylyna barǵan kezde ata-enesi Maqsot Qarabalın men Násip Óteshqalıevany óltirip, saraı ishine kómip ketken. Al. Meıramgúl Qarabalınany Atyraýda ýaqytsha turyp jatqan úıine ákelip, pyshaq jaraqatyn salǵan. Saldarynan ol da kóz jumdy.
Marqumdardyń qyzy men baýyry esepteletin Aqbaıan Muqaǵalıevanyń adam óltirý faktisine qatysy joq ekeni belgili boldy.
Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi.
6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.
Keıin olardyń denelerinde pyshaq izderi bary belgili boldy.
9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni resmı túrde belgili boldy. ndaı aq joǵalǵan otbasy týraly tyń derekterdi áleýmettik jeli arqyly taratqan hakerge halyqaralyq izdeý jarııalanǵan edi.
Aqpan aıynyń basynda kúdiktiń 5 balasy memleket qamqorlyǵyna alyndy.
Aqpan aıynyń sońynda kúdikti men marqumdardyń jaqyny esepteletin Aqbaıan Muqanǵalıeva Indonezııada ustaldy.
Eki kúdiktiniń shetelde qalaı ustalǵany jóninde vıdeo jarııalandy.
Birneshe kúnnen keıin olar Atyraý qalasyna jetkizildi.
Keıin polıtsııa Atyraý oblysy Jangeldın aýylynda bútin bir otbasyny óltirdi degen kúdikke ilingen Sultan Sarsemalıevti ata-enesin óltirgen úıge apardy. Ol tergeýshilerge qylmysty qalaı jasaǵanyn kórsetip, suraqtarǵa jaýap bergen.
Іshki ister mınıstrligi jarııalaǵan vıdeodan Sultan Sarsemalıevtiń qalada jaldap turǵan úıiniń irgesinen qazǵan shuńqyrdy kórsetkenin baıqaýǵa bolady.
Ol sot sanktsııasymen 2 aıǵa qamaýǵa alynǵan edi.
Sultan Sarsemalıevke júrgizilgen psıhıkalyq saraptamanyń nátıjesinde onyń aqyl-esi durys ekeni belgili boldy.
