Jangeldın isi: Sultan Sarsemalıev máıitterdi qalaı jasyrǵanyn baıandady
ATYRAÝ. KAZINFORM — Tórt adamnyń ólimine qatysty sotta kúdikti Sultan Sarsemalıevtiń tergeý kezindegi vıdeosy kórsetildi. Onda ol qylmysty jasyrýǵa sheshim qabyldaǵanyn jáne qaıynapasynyń jaǵdaıyna alańdamaǵanyn aıtqan.
Búgingi sot otyrysynda Sultan Sarsemalıev jaýap berýge daıyn emestigin aıtty. Sodan keıin sýdıa kúdiktiniń tergeý barysynda túsirilgen vıdeony qaraý týraly sheshim qabyldady.
Sot kezinde kórsetilgen vıdeoda Sultan Sarsemalıev qaıynaǵasymen qalaı sózge kelip qalǵanyn, úı ishinde kúresip, keıin as bólmesinde pyshaqtaǵanyn kórsetti. Kúdikti sol kezde polıtsııa shaqyrý týraly oı bolǵanyn jasyrmady.
— Oqıǵa 10 mamyr kúni saǵat 11:00 shamasynda boldy. Kesh batqanǵa deıin úıge kirgen joqpyn. 5 balam men áıelimdi oılap, polıtsııaǵa habarlaspadym. Keshkilik ýaqytta naqty sheshimge kelip, qylmysty jasyrýǵa kiristim, — degen tergeý kezinde kúdikti Sultan Sarsemalıev.
Jasyratyn jer izdep, ony alysqa súıreıtindeı kúshi bolmaǵan. Sondyqtan úı irgesinen 60 sm aralyqtaǵy jerdi qazyp bastaǵan. Oqıǵa ornynda kúdikti qaıynapasy Meıramgúl Qarabalınany da qalaı óltirgenin aıtyp berdi.
— 6 qarasha kúni bazarǵa baryp keldim. Ashanadan kútip aldy. Aqbaıan men qyzym ishki bólmede uıyqtap jatty. Meıramgúl ketetinin aıtyp, maǵan til tıgizdi. Ar-namysyma tıetin sózder aıtty. Ol bir sóılese toqtamaıdy. Ákelgen tamaqty shyǵaryp jatqanda qaladaǵy týysqandarǵa aparyp tasta dedi. Oǵan deıin úsh adamdy óltirgendikten be, ony da qurtý týraly oı keldi. Negizi men ony Aqbaıanǵa es bolsynshy dep alyp keldim. Jerde úlken kilem jatty. Toqtamaıtynyn túsinip, tońazytqyshtyń ústindegi pyshaqty alyp, ishinen tyqtym, — dep jaýap bergen kúdikti.
Tergeý barysynda Sultan Sarsemalıev Meıramgúl Qarabalınanyń pyshaqtaǵannan keıin onyń jaǵdaıyna alańdamaǵanyn ashyq aıtty. Ol sol kúni saǵat 20:00–de múrdeni kómýdi maqsat etken. Degenmen úı mańyndaǵy temirjoldan birneshe ret poıyz ótkendikten qazýdy toqtatýǵa týra kelgen. Kúdiktiniń aıtýynsha, ol qazý jáne kómý jumysyn túngi saǵat 01:00–ge deıin aıaqtaǵan.
Qan daqtaryn jasyrý úshin as bólmesindegi jardy boıap tastapty. Kúdikti tergeý kezinde ata-enesimen bolǵan janjaldan keıin, olardy óltirmesten buryn óz-ózine qol jumsamaq bolǵanyn aıtqan.
Aıta keteıik, Aqbaıan Muqanǵalıevanyń jeke kýáliginiń túpnusqasy, 1 top múgedektigin rastaıtyn qujattyń túpnusqasy Sultan Sarsemalıevtiń ápkesiniń úıinen tabylǵan. Sondaı-aq, olardyń qatarynda Sultan Sarsemalıevtiń ekinshi nómiri, kúdiktiniń Aıdana Sarsemalıevaǵa bergen senimhaty bar.
Buǵan deıingi otyrysta Aqbaıan Muqanǵalıevanyń tergeý kezinde ne aıtqany belgili bolǵan.
Jalpy sotta kúdikti enesiniń altyndaryn lombardqa ótkizgeni kórsetildi.
Jangeldın aýylynda baqtashy marqumdardyń malyn kúnine 3 myń teńgege baqqany aıtyldy.
Ótken sot otyrystarynyń birinde Atyraý qalasynda eki múrde tabylǵan úıdiń ıesine jaldaý aqysy beıtanys adamnan túsip otyrǵany belgili boldy.
Jalpy sotqa deıingi tergeý kezinde kúdiktiniń 2 advokaty bolǵan. Qazir Sultan Sarsemalıevti bireýi qorǵap jatyr. Advokat Asan Jumabaev sottalýshyny qazir kináli dep aıtýǵa erte ekenin málimdegen edi.
Kúdikti 2024 jyly kásipkerlik nysandardyń birine jaldamaly jumysshy bolyp, jer qazyp, qoqys shyǵarǵan. Sultan men jumys bergen kásipker bir yqshamaýdanda turǵan. Ara tura bir-birin kórgennen keıin aǵa-ini bolyp aralasqan. Kýá sol kezde Sultan Sarsemalıevtiń qara jumysqa ıkemdi, qoly mashyqtanǵan, jerdi jalǵyz ózi qazatyn qaıratty ekenin aıtqan.
Aıyptalýshy Sultan Sársemalıev sotta qaıynaǵasy Naýryz Muqanǵalıevti qasaqana emes, ózin-ózi qorǵaý maqsatynda óltirgenin málimdedi. Tergeý barysynda ol Naýryz Muqanǵalıevti mamyr aıynda ózi qalada jalǵa alǵan úıinde óltirip, úı irgesine kómip tastaǵany belgili bolǵan.
Sot otyrysy kezinde memlekettik aıyptaýshy da, aıyptalýshy da qylmysqa otbasylyq janjal sebep bolǵanyn aıtty.
Kúdiktige qatysty QR Qylmystyq kodeksiniń 99-baby 2-bóliginiń 1-tarmaǵyna sáıkes (eki jáne odan da kóp adamdy óltirý), sondaı-aq mal satý, kartalardy jymqyrý derekteri boıynsha osy kodekstiń 188 jáne 190 baptary aıasynda qylmystyq is qozǵalǵan edi.
Al qarasha aıynda kúdikti bir pyshaqpen úsh adamdy óltirgen. Jangeldın aýylyna barǵan kezde ata-enesi Maqsot Qarabalın men Násip Óteshqalıevany óltirip, saraı ishine kómip ketken. Al Meıramgúl Qarabalınany Atyraýda ýaqytsha turyp jatqan úıine ákelip, pyshaq jaraqatyn salǵan. Saldarynan ol da kóz jumdy.
Marqumdardyń qyzy men baýyry esepteletin Aqbaıan Muqaǵalıevanyń adam óltirý faktisine qatysy joq ekeni belgili boldy.
Sultan Sarsemalıevke júrgizilgen psıhıkalyq saraptamanyń nátıjesinde onyń aqyl-esi durys ekeni belgili boldy.
Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi. 6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.
