Jangeldın isi: kúdikti qaıynaǵasyn qasaqana óltirmegenin aıtty
ATYRAÝ. KAZINFORM — Atyraý oblysy Qyzylqoǵa aýdanynda bútin bir otbasynyń ólimine qatysty rezonansty is boıynsha negizgi sot otyrysy bastaldy. Aıyptalýshy Sultan Sársemalıev sotta qaıynaǵasy Naýryz Muqanǵalıevti qasaqana emes, ózin-ózi qorǵaý maqsatynda óltirgenin málimdedi.
- Naýryz Muqanǵalıevtiń provokatsııalyq áreketinen óz-ózimdi qorǵaný maqsatynda abaısyzda bolǵan qylmystyq is dep esepteımin, - dedi aıyptalýshy sotta.
Sársemalıev ata-enesi men qaıynapasyn qasaqana óltirgenin, keıin qylmysty jasyrý úshin olardyń maldaryn satyp, jeke qujattary men zattaryn ıemdenip, nesıe rásimdegenin moıyndady. Aıyptalýshy bul qandy oqıǵany ózi men áıeliniń arasyna túsken ata-enesiniń is-áreketimen baılanystyrdy. Sot barysynda ol 2024 jylǵy shildede Aqbaıan aýrýhanaǵa túsken kezde onyń qasyna jiberilmegenin aıtyp, sol jaǵdaıdan keıin renishtiń kúsheıgenin jetkizdi.
Búgingi sot otyrysynda marqum Maqsot Qarabalınniń qaryndasy Ádemi Shylmaǵambetova aıyptalýshynyń sózderimen kelispeıtinin aıtty. Onyń sózinshe, Aqbaıan men Sultannyń resmı ajyrasýyna Sársemalıevtiń basqa adammen kóńil qosýy sebep bolǵan.
Sot kezinde Naýryz Muqanǵalıevke 10, Maqsot Qarabalınge 9, Násip Óteshqalıevaǵa 8, al Meıramgúl Qarabalınaǵa 32 ret pyshaq jaraqaty salynǵany aıtyldy.
Jábirlenýshi tarap kúdiktiniń Naýryz Muqanǵalıevtiń atynan týystaryna habarlamalar jazyp, túrli jalǵan aqparat taratqanyn málimdedi.
- Sultan Sarsemalıev Naýryz Muqanǵalıevtiń telefonyn ıemdenip, keıin onyń atynan týysqandarǵa túrli habarlama jiberdi. Áke-sheshesi men apasyn Tashkentke alyp ketkenin, anasy emdelip jatqanyn jazdy. Tipti úılenetinin aıtty. Aýylǵa keletin kúnderin birneshe ret ózgertip, aýdıo baılanys jasaǵym kelip soqqanda, telefondy kótergen joq. Kelesi kúni ǵana jazbasha jaýap beretin , — dedi Maqsot Qarabalınniń qaryndasy Ádemi Shylmaǵambetova.
Kúdikti buǵan uqsas áńgimeni enesiniń týystaryna da aıtqan. Jábirlenýshi Tilekqabyl Óteshqalıevke apasy Násip Óteshqalıevadan 7 qarasha kúni aýdıohabarlama kelip túsken. Al tergeý málimetine sáıkes, Maqsot Qarabalın men Násip Óteshqalıeva 3 qarashada kóz jumǵan. Jábirlenýshi tarap ol aýdıonyń buryn jazylǵan jazbalardyń biri dep oılaıtynyn aıtty.
- Naýryzdan «Men otbasy quramyn, kerek kezde kómektese almadyńdar, endi maǵan kerekteriń joq» degen habarlama keldi. «Men osy jaqta shańyraq kóterip, áke-sheshemdi ózim qaraımyn, meni mazalamańdar» dep te jazyp jiberdi. Naýryz Sultanmen kezdeskende qolyna qarý ne taıaq ustap bardy dep oılamaımyn. Óz-ózińdi qorǵaý bolsa, Naýryzǵa 10 ret pyshaq salatyn ba edi?! - dedi marqum Násip Óteshqalıevanyń inisi Tilekqabyl Óteshqalıev.
Marqumdardyń týystary Naýryzdyń vıdeoqońyraý arqyly sóılesýden bas tartýyn, aýyldaǵy maldyń satylyp jatqanyn kúmándi kórip, keıin izdeý jumystaryn bastaǵan.
Búgingi otyrysta memleket tarapynan járdemaqy men zeınetaqy tólemderi boıynsha keltirilgen shyǵyn kólemi aıtyldy. Naýryz Muqanǵalıevke maýsym aıynan bastap jeltoqsanǵa deıin 520 myń teńge kóleminde járdemaqy aýdarylǵan. Al Maqsot Qarabalın men Násip Óteshqalıevaǵa zeınetaqy, Meıramgúl Qarabalınaǵa járdemaqy jeltoqsan aıy úshin tólengen. Munyń kólemi 255 myń teńgeden asady.
Erteń sot protsesi jalǵasady. Jospar boıynsha 26 kýáden jaýap alý josparlanyp otyr.
Qylmystyq iske Atyraý oblysynyń qylmystyq ister jónindegi mamandandyrylǵan aýdanaralyq sotynyń sýdıasy Zarema Hamıdýllına tórelik etip jatyr.
18 mamyr kúni aldyn ala sot otyrysy ótti.
Sol kezde Sultan Sarsemalıev isti alqa bılerge berýden bas tartty.
Sot otyrysy kezinde memlekettik aıyptaýshy da, aıyptalýshy da qylmysqa otbasylyq janjal sebep bolǵanyn aıtty.
Tergeý barysynda Sultan Sarsemalıev Naýryz Muqanǵalıevti mamyr aıynda ózi qalada jalǵa alǵan úıinde óltirip, úı irgesine kómip tastaǵany belgili bolǵan.
Al qarasha aıynda kúdikti bir pyshaqpen úsh adamdy óltirgen. Jangeldın aýylyna barǵan kezde ata-enesi Maqsot Qarabalın men Násip Óteshqalıevany óltirip, saraı ishine kómip ketken. Al. Meıramgúl Qarabalınany Atyraýda ýaqytsha turyp jatqan úıine ákelip, pyshaq jaraqatyn salǵan. Saldarynan ol da kóz jumdy.
Buǵan deıin marqumdardyń qyzy men baýyry esepteletin Aqbaıan Muqaǵalıevanyń adam óltirý faktisine qatysy joq ekeni belgili boldy.
Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi.
6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.
Keıin olardyń denesinde pyshaq izderi bary belgili boldy.
9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni resmı túrde belgili boldy.
Sondaı aq joǵalǵan otbasy týraly tyń derekterdi áleýmettik jeli arqyly taratqan hakerge halyqaralyq izdeý jarııalanǵan edi.
Aqpan aıynyń basynda kúdiktiń 5 balasy memleket qamqorlyǵyna alyndy.
Aqpan aıynyń sońynda kúdikti men marqumdardyń jaqyny esepteletin Aqbaıan Muqanǵalıeva Indonezııada ustaldy.
Eki kúdiktiniń shetelde qalaı ustalǵany jóninde vıdeo jarııalandy.
Birneshe kúnnen keıin olar Atyraý qalasyna jetkizildi.
Keıin polıtsııa Atyraý oblysy Jangeldın aýylynda bútin bir otbasyny óltirdi degen kúdikke ilingen Sultan Sarsemalıevti ata-enesin óltirgen úıge apardy. Ol tergeýshilerge qylmysty qalaı jasaǵanyn kórsetip, suraqtarǵa jaýap bergen.
Іshki ister mınıstrligi jarııalaǵan vıdeodan Sultan Sarsemalıevtiń qalada jaldap turǵan úıiniń irgesinen qazǵan shuńqyrdy kórsetkenin baıqaýǵa bolady.
Ol sot sanktsııasymen 2 aıǵa qamaýǵa alynǵan edi.
Sultan Sarsemalıevke júrgizilgen psıhıkalyq saraptamanyń nátıjesinde onyń aqyl-esi durys ekeni belgili boldy.
