Jangeldın isi: baqtashy marqumdardyń malyn kúnine 3 myń teńgege baqqan

- Kúndelikti jumysyma aqshany Maqsot Qarabalınnyń Kaspi Gold-y arqyly aýdaryp otyrdy. Qarasha aıynyń ortasynda oǵan Naýryzdan mal satý kerektigi týraly aıtylyp, satyp alatyn azamattar kele bastady. Men olarǵa qoradaǵy maldy kórsettim, - dedi malshy, aýyl turǵyny Darhan Baqytov.

Jalpy kýá marqumdardyń malyn eki jarym aıǵa jýyq qaraǵan. Mal baǵý aqysyn kún saıyn bolmasa da suraǵan kezde berip otyrǵan. Keıin malshynyń eńbegine bir sıyr beremin dep kelisken. 

Mal satyp jatqan kezde marqumdardyń týysy kelip, bul iste bir shıkilik baryn aıtyp, maldy eshkimge bermeýdi tapsyrady.

- Naýryz úı úlkenderi Tashkentte em alyp jatyr dedi. Men sol aqparatqa sendim. Eshqandaı kúmán týyndaǵan joq, - dep tolyqtyrdy kýá óz sózinde.

Kýániń aıtýynsha, qural-saımandardan eshqandaı belgi baıqalmaǵan. Olar úı mańynda sholanda turǵan.

- Maldy baǵyp júrgen kezde úı men saraıǵa kirmedim. Jylytý peshi turǵan jerden úıdiń kiltin baıqamadym, - dedi Darhan Baqytov.

Taraptar alǵashynda 1 aıǵa kelisken. Alaıda Naýryz Muqanǵalıev habarlama arqyly áke-sheshesiniń jýyqta kelmeıtinin aıtyp, ázirge qaraı berýdi suraǵan. Darhan Baqytov pen Naýryz Muqanǵalıev buryn aralasqan. Kýániń aıtýynsha, Naýryz namaz oqyǵan.

Búgingi sot otyrysynda Jangeldın aýyly halqynyń malyn baǵatyn baqtashy da kýálik etti. Ol marqumdardy aýyl turǵyny retinde tanıtynyn aıtty. Baqtashy turǵyndardyń iri qarasyn kóktemnen kúzge deıir baǵyp bergen. Sáýir aıynda oǵan Maqsot Qarabalın 4 sıyryn senip tapsyrǵan. Sońǵy tólemdi qazan aıynda jasapty.

- 25 qarashada 4 bas sıyrdy ákeldim. Maqsot aǵaǵa telefon soqqanda kótermedi. Úıge kelgende eshkim bolmady. Malyn qamap kettim, - dedi baqtashy.

Qarasha aıynda bul otbasydan eshkim habarlaspaǵan. Qarasha aıyna tólem jasalmapty.

Eki kýá de Naýryz Muqanǵalıevpen tek What’s App qosymshasy arqyly habarlama jazyp sóılesken. Aýdıo qońyraý arqyly baılanyspaǵan.

Buǵan deıingi otyrysta Atyraý qalasynda eki múrde tabylǵan úıdiń ıesinen jaldaý aqysy beıtanys adamnan túsip otyrǵany belgili boldy.

Jalpy sotqa deıingi tergeý kezinde kúdiktiniń 2 advokaty bolǵan. Qazir Sultan Sarsemalıevti bireýi qorǵap jatyr. Advokat Asan Jumabaev sottalýshyny qazir kináli dep aıtýǵa erte ekenin málimdegen edi.

Kúdikti 2024 jyly kásipkerlik nysandardyń birine jaldamaly jumysshy bolyp, jer qazyp, qoqys shyǵarǵan. Sultan men jumys bergen kásipker bir yqshamaýdanda turǵan. Ara tura bir-birin kórgennen keıin aǵa-ini bolyp aralasqan. Kýá sol kezde Sultan Sarsemalıevtiń qara jumysqa ıkemdi, qoly mashyqtanǵan, jerdi jalǵyz ózi qazatyn qaıratty ekenin aıtqan.

Buǵan deıin negizgi sot otyrysynda aıyptalýshy Sultan Sársemalıev sotta qaıynaǵasy Naýryz Muqanǵalıevti qasaqana emes, ózin-ózi qorǵaý maqsatynda óltirgenin málimdedi.

Qylmystyq iske Atyraý oblysynyń qylmystyq ister jónindegi mamandandyrylǵan aýdanaralyq sotynyń sýdıasy Zarema Hamıdýllına tórelik etýde.

18 mamyr kúni aldyn ala sot otyrysy ótti.

Sol kezde Sultan Sarsemalıev isti alqa bılerge berýden bas tartty.

Sot otyrysy kezinde memlekettik aıyptaýshy da, aıyptalýshy da qylmysqa otbasylyq janjal sebep bolǵanyn aıtty.

Tergeý barysynda Sultan Sarsemalıev Naýryz Muqanǵalıevti mamyr aıynda ózi qalada jalǵa alǵan úıinde óltirip, úı irgesine kómip tastaǵany belgili bolǵan.

Al qarasha aıynda kúdikti bir pyshaqpen úsh adamdy óltirgen. Jangeldın aýylyna barǵan kezde ata-enesi Maqsot Qarabalın men Násip Óteshqalıevany óltirip, saraı ishine kómip ketken. Al. Meıramgúl Qarabalınany Atyraýda ýaqytsha turyp jatqan úıine ákelip, pyshaq jaraqatyn salǵan. Saldarynan ol da kóz jumdy. 

Buǵan deıin marqumdardyń qyzy men baýyry esepteletin Aqbaıan Muqaǵalıevanyń adam óltirý faktisine qatysy joq ekeni belgili boldy.

Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi.

6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.

Keıin olardyń denelerinde pyshaq izderi bary belgili boldy.

9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni resmı túrde belgili boldy.

Sondaı aq joǵalǵan otbasy týraly tyń derekterdi áleýmettik jeli arqyly taratqan hakerge halyqaralyq izdeý jarııalanǵan edi.

Aqpan aıynyń basynda kúdiktiń 5 balasy memleket qamqorlyǵyna alyndy.

Aqpae aıynyń sońynda kúdikti men marqumdardyń jaqyny esepteletin Aqbaıan Muqanǵalıeva Indonezııada ustaldy.

Eki kúdiktiniń shetelde qalaı ustalǵany jóninde vıdeo jarııalandy.

Birneshe kúnnen keıin olar Atyraý qalasyna jetkizildi.

Keıin polıtsııa Atyraý oblysy Jangeldın aýylynda bútin bir otbasyny óltirdi degen kúdikke ilingen Sultan Sarsemalıevti ata-enesin óltirgen úıge apardy. Ol tergeýshilerge qylmysty qalaı jasaǵanyn kórsetip, suraqtarǵa jaýap bergen. 

Іshki ister mınıstrligi jarııalaǵan vıdeodan Sultan Sarsemalıevtiń qalada jaldap turǵan úıiniń irgesinen qazǵan shuńqyrdy kórsetkenin baıqaýǵa bolady.

Ol sot sanktsııasymen 2 aıǵa qamaýǵa alynǵan edi.

Sultan Sarsemalıevke júrgizilgen psıhıkalyq saraptamanyń nátıjesinde onyń aqyl-esi durys ekeni belgili boldy.