Jangeldın aýdanynyń ekologııasyna esh qaýip joq - Beıbit Atamqulov

ASTANA. QazAqparat - Qostanaı oblysy Jangeldın aýdanynyń ekologııasyna zymyran qaldyqtary qulaǵannan esh zııan kelmeıdi. Bul týraly búgin QR Parlamenti Májilisinde elimizdiń Qorǵanys jáne aeroǵarysh ónerkásibi mınıstri Beıbit Atamqulov BAQ ókilderiniń saýalyna oraı aıtty, dep habarlaıdy QazAqparat.

«Bul másele memlekettik organdarmen áli kelisilgen joq. Sonymen qatar aǵymdaǵy jyldyń kúzinde Jangeldın aýdanyna qosymsha baryp qaıtý josparlanǵan. Aǵymdaǵy jyly josparly ushyrýlar kózdelip otyrǵan joq. Bólingen jer 22 shaqyrymǵa 44 shaqyrym. Ekologııalyq qaýipsizdikke qatysty aıtar bolsam, ekologııalyq saraptama qazaqstandyq taraptan da, reseılik taraptan da júrgizildi. Buǵan qosa, qoǵamdyq birlesikter deekologııalyq qaýipsizdikke, ásirese jan-janýarlar álemine zertteý júrgizdi. Keleshekte ushyrý boıynsha sheshim qabyldanyp jatatyn bolsa, onda úsh jyldyń ishinde 7 ushyrý ǵana bolatynyn taǵy da aıtamyn. Ottekti-kerosındi otyndy qozǵaltqyshy bar ekologııalyq taza zymyran qoldanylatyn bolady», - dedi mınıstr.

Beıbit Atamqulovtyń dereginshe, zymyran ushyrǵannan keletin ekologııalyq shyǵyn Qazaqstannyń áýe keńistiginen ushaqtardyń ushyp ketýinen keletin shyǵynnan 75 ese tómen. Zymyran bólshekteri qulaýǵa bólingen jer memlekettik qorda tur jáne ol aýyl sharýashylyǵy úshin paıdalanylmaıdy.

Buǵan deıin habarlanǵandaı, Jankeldın aýdany aýmaǵynan zymyran qaldyqtaryn qulatý úshin 76 myń gektar jer 3 jylǵa beriletin bolyp sheshildi. Qaldyqtar belgilengen jyldar ishinde birneshe ret qulaıdy. Sondaı-aq, aýdan bıýdjetine jyl saıyn 151 mln teńge qarjy aýdarylady. Al irgesine qaldyq tastalatyn Aqkól men Qarasý aýyldaryna jedel járdem kólikteri bólinip, aýyzsý tartylady.