«Janǵa daýa kıno» qaıyrymdylyq jobasy aıasynda Gollıvýd jáne Reseı juldyzdary balalar onkologııalyq ortalyǵy men balalar Hospısinde bolyp qaıtty

Jobanyń maqsaty dıagnozyna qaramastan barlyq balanyń kıno kórýine, belgili ánshi, ártistermen jáne kıno juldyzdarymen kezdesýine múmkindik jasaý bolyp tabylady.

«Joba janǵa batqan syrqatqa shydap, ómir úshin arpalysqannan basqa amaly joq balalar men jasóspirimderge arnalǵan. Bizdiń kınematografııa salasynda tanystarymyz kóp. Biz osyny paıdalanyp, kıno juldyzdary arqyly balalar problemasyna jurtshylyq nazaryn aýdarǵymyz keledi. Bul ataýdy tańdap alýymyzdyń sebebi de osy», - deıdi jobanyń bas prodıýseri Djýlııa Ǵanı.

Keshe atalmysh sharanyń birinshi kúni múmkindigi shekteýli balalar Royal Tulip Almaty qonaq úıinde Sıntııa Rotrok, Armand Assante, Bolo ıAng, Dennı Treho, «Aıdahar» nyspyly Don Ýılson, Olıve Grıýner, Kerrı Tagava syndy tanymal Gollıvýd juldyzdarymen kezdesti. Sondaı-aq, balalar móltek fılmder men kórkem fılmderdi tamashalady. «Bul kezdesýler balalardyń kóńilin kóterýge, bir kún bolsyn kóńilderiniń jadyraýyna yqpal etedi degen úmittemiz», deıdi sharany uıymdastyrýshylar.

Joba sheńberinde Almatyǵa álemdik kınematografta aty ańyzǵa aınalǵan akter, kóptegen kórermenniń kýmıri Alen Delon de keldi. Qazaqstanǵa tuńǵysh ret at basyn tiregen ataqty akter aıyqpas onkologııalyq dertke shaldyqqan balalarǵa arnalǵan Hospıste bolyp qaıtty. Al, Avraam Rýsso, Agnııa Dıtkovskıte, Egor Konchelovskıı syndy juldyzdar Almatydaǵy Onkologııa ınstıtýtynyń balalar bólimshesine at basyn tiredi. Juldyzdar balalarǵa ákelgen syı-syıapattaryn jasap, balalarmen áńgimelesti. Uıymdastyrýshylar búldirshinderge arnaıy daıyndaǵan oıyn-saýyq baǵdarlamalaryn usyndy.

«Búgingi tańda Qazaqstanda qaıyrymdylyqpen aınalysqan jandardy durys túsinbeıtinder jetip artylady. Biz úshin eń bastysy demeýshilerdi jarnamalaý emes, balalarǵa kómektesý. Bizden «nege sizder sheteldik juldyzdardy shaqyryp aqsha shashqandy jaqsy kóresizder, onyń ornyna tonnalap dári-dármek satyp alýǵa bolatyn edi ǵoı» dep suraıtyndar barshylyq. Biraq olarǵa sol tonna-tonna dári-dármektiń qajeti joqtyǵyn aıtqym keledi. Qazir bul balalarǵa keregi - aýrýyn ýaqytsha bolsa da sezdirmeıtin, onyń janǵa batpaýyna kómektesetin dáriler ǵana kerek»,-dedi D. Ǵanı.

Joba sońynda saltanatty keshki as beriledi. Shara barysynda eksklıýzıvti kıno jobalardyń tusaýy kesilip, alǵashqy qazaqstandyq kınonagradalar tabys etiledi jáne qaıyrymdylyq aýktsıony ótedi. Aýktsıonnan jınalǵan qarjy Almaty qalasyndaǵy №1-shi balalar hospısine reanımatsııalyq avtokólik satyp alýǵa jumsalmaq. Kólikti syrqat balalardyń úılerine baryp kómek kórsetetin arnaıy qyzmet brıgadasy paıdalanady. «Olar balalarǵa psıhologııalyq kómek kórsetip, dári-dármek beredi jáne ata-analarǵa qoldaý kórsetedi. Osy qyzmette jumys isteýge kelisken eriktiler úıde qalyp, balaǵa qaraıdy. Al, ata-anasy sharýasyn bitirýge ýaqyt tabatyn bolady. Bul da bolsa otbasyndaǵy jaǵdaıdy birshama jaqsartady dep senemiz»,- deıdi qaıyrymdylyq aktsııasyn uıymdastyrýshylar.