Jandos Shaımardanov: Qoǵam bılik tarmaqtarynyń arasyndaǵy tepe-teńdikke qatysty suraqtar kóterip jatyr

ASTANA. KAZINFORM — Prezıdent janyndaǵy Qazaqstannyń strategııalyq zertteýler ınstıtýtynyń dırektory Jandos Shaımardanov qazaqstandyqtardy jańa Konstıtýtsııanyń jobasynda qandaı máseleler alańdatyp otyrǵanyn aıtty. 

— Azamattardyń edáýir bóligi úshin Ata zańda adam quqyqtary men bostandyqtarynyń basymdyǵy qalaı bekitiletini, azamattardy zań aldynda qorǵaýdyń túsinikti ári birkelki erejelerin qalaı qalyptastyratyny mańyzdy bolyp otyr. Osy turǵyda Konstıtýtsııa jeke adamnyń erkindigi men ulttyq múdde arasyndaǵy tepe-teńdikti qamtamasyz etetin qural retinde qarastyrylady, — dedi ol.

Instıtýt basshysy múddeler teńgerimi máselesi halyqty tek adam quqyqtary men bostandyqtary aıasynda ǵana emes, halyqaralyq mindettemeler, ulttyq múddeler, zańnama turǵysynan da oılandyratynyn atap ótti.

— Nátıjesinde qaısysyna basymdyq berilýge tıis degen saýal týyndaıdy. Birin ekinshisine táýeldi etip qoımaımyz ba degen kúdik te bar. Qoǵam qazirgi usynylyp otyrǵan ókilettikterdiń bólinisi aıasynda bılik tarmaqtarynyń arasyndaǵy tepe-teńdikke qatysty suraqtar kóterip jatyr. Qoǵam óz bıligin saıası bılikke tabystaǵandyqtan, Prezıdent, Quryltaı, Qazaqstan halyq keńesi arasyndaǵy ókilettikterdiń bólinisi qandaı bolmaq degen suraqtar da kezdesedi, — dedi Jandos Shaımardanov.

Aıta ketý kerek, ótken apta aıaǵynda jarııalanǵan jańa Konstıtýtsııanyń jobasynda memlekettik tildiń mártebesi týraly norma 9-bapta ornalasqan. Ol jerde memlekettik til — qazaq tili ekeni, al memlekettik mekemeler men ózin-ózi basqarý uıymdarynda orys tili memlekettik tilmen qatar qoldanylatyny aıtylǵan.