Qamaýda ustaý merzimin 48 saǵatqa qysqartý usynysy qosymsha talqylaýdy qajet etedi – Jandos Ómirálıev
ASTANA. KAZINFORM – Búgin Konstıtýtsııalyq reformalar jónindegi komıssııanyń úshinshi otyrysynda QR Bas Prokýrorynyń birinshi orynbasary Jandos Ómirálıev usynylǵan túzetýlerge qatysty vedomstvonyń ustanymyn jarııalady.
– Konstıtýtsııalyq reforma elimizdiń quqyqtyq memleket retinde odan ári damýyna jańa serpin berdi. Onyń ishinde bizdiń eń joǵary qundylyqtarymyz – adam, onyń ómiri, quqyǵy men bostandyǵy sanalatyn qaǵıdattar basty orynǵa ıe boldy. Barlyq usynys óte mańyzdy, ony qoldaımyz. Degenmen, keıbir usynystar qosymsha talqylaýdy qajet etedi degen oı bar. Bul turǵyda Konstıtýtsııanyń 16-babyna sot sanktsııasynsyz adamdy qamaýda ustaý merzimin 72 saǵattan 48 saǵatqa deıin qysqartý jóninde usynylyp otyrǵan túzetýdi jan-jaqty pysyqtaý kerek. Konstıtýtsııada adam men azamattyń quqyǵynyń jáne bostandyǵynyń negizgi kepildikteri bar ekenin atap ótken jón. Bizdiń oıymyzsha, Konstıtýtsııanyń ózin, ıaǵnı 48 saǵattyq qamaý merzimin jáne ony erekshe jaǵdaılarda uzartý negizderin egjeı-tegjeıli sıpattaý artyqtaý bolatyn sııaqty, - dedi Jandos Ómirálıev.
Osy oraıda ol bul jaǵdaı Qylmystyq-protsestik kodeksi aıasynda retteletinin aıtty. Bul qujatta 48 saǵat, al erekshe jaǵdaılarda 72 saǵatqa deıin ustaý merzimi reglamenttelgen. Sonymen qatar sot jáne tergeý tájirıbesi qazirdiń ózinde osy baǵytta jyljyp keledi.
– Búginde 85% jaǵdaıda kúdiktilerdi sot sanktsııasynsyz ustaý merzimi 48 saǵattan aspaıtynyn kórip otyrmyz. Bul óz kezeginde elektrondy qylmystyq isterge qatysty evolıýtsııalyq tsıfrlyq ekojúıeni keńinen engizýdiń arqasynda múmkin boldy, - dedi Bas prokýrordyń birinshi orynbasary.
Ol aıǵaqtardy jınaý protsesi tolyǵymen tsıfrlandyrylǵanyn atap ótti. Osyndaı tehnologııalyq ınfraqurylym bultartpaý sharasyn tańdaýǵa nemese ustalǵandardy 36 saǵat ishinde, al keıbir jaǵdaılarda 24 saǵat ishinde bosatýǵa múmkindik beredi.
Budan buryn habarlanǵandaı, Konstıtýtsııalyq reforma jónindegi komıssııanyń múshesi, Respýblıkalyq advokattar alqasynyń tóraǵasy Mádı Myrzaǵaraev Qazaqstan aýmaǵynda sot sanktsııasynsyz ustaý merzimin 72 saǵattan 48 saǵatqa deıin qysqartýdy usyndy.