Jandarbek Bekshın: Turǵyndar mindetti túrde qyzylshaǵa qarsy ekpe jasatýy kerek

ASTANA. QazAqparat - Qyzylsha aýrýy qazirgi tańda álem elderin birshama abdyratyp otyr. Tipti Ýkraınada qyzylsha aýrýyn juqtyrǵandardyń sany 38 myńǵa jetken. Al Qazaqstandaǵy bul baǵyttaǵy ahýal qandaı? Ol týraly OKQ-da ótken baspasóz máslıhatynda QR Densaýlyq saqtaý mınıstrligi Qoǵamdyq densaýlyq saqtaý komıtetiniń tóraǵasy - bas memlekettik sanıtar dáriger Jandarbek Bekshın aıtyp berdi, dep habarlaıdy QazAqparat tilshisi.

«Bizdi alańdatatyny - qyzylsha aýrýy. Biletinderińizdeı, qyzylsha búkil álemdik másele. Nege deseńiz, álemde barlyq elderde 300 myńnan astam qyzylshamen aýrý jaǵdaıy tirkeldi. Onyń ishinde tek Eýropa elderinde 70 myńnan astam adam qyzylsha juqtyrǵan. Bizdiń zertteýimiz boıynsha, qazirgi tańda dál osy Eýropa elderindegi qyzylshanyń túrleri tirkelip jatyr. Bul - bizdiń jasalǵan taldaýymyz. Nege deseńiz, bizdiń elimizdiń turǵyndary qarym-qatynas boıynsha kóptep saıahatqa shyǵady, issaparlarǵa barady. Ókinishke qaraı, Eýropada 68 jaǵdaı ólimmen aıaqtalǵan. Bizdiń saıahatshylarymyz, turǵyndarymyz jolǵa shyqqan kezde ózderiniń jolyn josparlaýy kerek. Nege deseńiz, árbir azamat shyǵatyn eliniń epıdemıologııalyq ahýalyn bilip alýy tıis. Balalary qyzylsha boıynsha egilmese, mindetti túrde ekpe jasatý kerek», - deıdi Jandarbek Bekshın.

Onyń aıtýynsha, qyzylsha boıynsha Serbııa elinde 5 myńnan astam, Italııa men Frantsııada 3 myńdaı, Ýkraınada 38 myńdaı, Ulybrıtanııada 1 myńǵa jýyq jaǵdaı tirkelgen. Bizdiń eń jaqyn kórshilerimiz - Qyrǵyzstanda 1,5 myń jáne Reseıde 4 myńdaı jaǵdaı anyqtalǵan.

«Sol sebepti, biz osy baǵytta jumysty josparlap, aldyn alý sharalaryn júrgizip jatyrmyz. Aldyn alý sharalary qazirgi tańda oryndalýda. Qazirgi tańda bizde egý úshin vaktsına kólemi tolyǵymen qamtyldy. Elimizde turyp jatqan turǵyndardy vaktsınatsııaǵa shaqyramyz. Bıylǵy jyldyń ereksheligi - egilmegen adamdardyń 60 paıyzy 1 jasqa kelgen balalar. Bizdiń elimizde balalardyń birinshi ekpesi 1 jasta, ekinshisi 6 jasta jasalady. Sondyqtan, 12 aı jetpeı, 6 aı, 7 aı, 8 aıda aýyryp jatyr. Sondyqtan, biz arnaıy is-shara qabyldaýdamyz», - dedi Jandarbek Bekshın.

Onyń aıtýynsha, qyzylsha eń kóp tirkelip jatqan aımaqtar - Astana, Almaty, Atyraý, Shymkent qalalary jáne Aqmola oblysy. Bul aımaqtarda balalardyń egilýi 9 aıdan bastalady.

Eske sala ketsek, buǵan deıin Jandarbek Bekshın Almaty men Aqmola oblystarynda qyzylshanyń órshýine qatysty túsinikteme bergen bolatyn.