Jandarbek Bekshın taýar qaýipsizdigin taldaý jumystarynyń nátıjesin jarııalady
«Aı saıynǵy taǵam qaýipsizdiginiń monıtorıngi sheńberinde 2019 jyldyń birinshi toqsanynda 14 880 ónim túri alyndy. Onyń ishinde azyq-túlikke jatpaıtyn taýarlar tobyna 77 834 zertteý júrgizilip, onyń 3,5 paıyzy tehnıkalyq reglamentterdiń belgilengen kórsetkishterine sáıkes kelmeıtini anyqtaldy. Zerttelgen úlgilerdiń jalpy kóleminiń 72,6 paıyzy tańbalaýy boıynsha tehnıkalyq reglamentter talaptaryna sáıkes kelmeıdi. Mıkrobıologııalyq qaýipsizdik kórsetkishteri boıynsha 16,2 paıyzy, fızıkalyq-hımııalyq kórsetkishter boıynsha 11,2 paıyzy saı emes», - deıdi Jandarbek Bekshın.
Onyń aıtýyna qaraǵanda, ishki naryqta aınalymdaǵy ónimniń assortımenti, taýar pozıtsııalarynyń toptary baqylanǵan. Zertteýmen barlyq negizgi ónim toptary: sút ónimderi, qus eti, et jáne balyq ónimderi, kondıterlik jáne nan-toqash ónimderi, balalar taǵamynyń assortımenti, arnaıy tamaq ónimderi, shyryn ónimderi, energetıkalyq jáne basqa da alkogolsiz sýsyndar qamtylǵan. Sol sekildi azyq-túlikke jatpaıtyn taýarlar toptary ishinde oıynshyqtar, kıim, aıaqkıim, turmystyq hımııa taýarlary, gıgıena quraldary, áınek jýatyn suıyqtyq, parfıýmerııa jáne kosmetıka, taǵammen janasatyn metarıaldar, balalar taýarlary jáne basqalary baqylanǵan.
«Tamaq ónimderiniń 12,5 myńnan astam synamasy zertteldi. 65 myńnan astam zertteý júrgizildi, olardyń ishinde zertteýdiń 3,3 paıyzy belgilengen talaptarǵa sáıkes kelmeıdi. Sondaı-aq komıtet tek qaýipsiz ónimderdi ǵana emes, sonymen birge jalǵan ónimderdi anyqtaý, gendik túrlendirilgen obektilerdiń bolýyn, janýarlardan alynǵan tamaq ónimderindegi genomdardy tıpteý, ósimdik maılary men transızomerlerdi anyqtaý, ósý gormondarynyń, antıbıotıkterdiń bolýyn anyqtaý boıynsha sharalardy qabyldaýda. Zerthanalyq baqylaýdy Ulttyq saraptama ortalyǵynyń 17 oblystyq fılıaldan, 22 qalalyq jáne 154 aýdandyq bólimsheden turatyn 193 fılıaly júzege asyrady. Olar tehnıkalyq reglamentter kórsetkishteriniń 90 paıyzyna deıin qamtamasyz etedi», - deıdi Jandarbek Bekshın.
Onyń aıtýyna qaraǵanda, búgingi kúni Komıtettiń Ulttyq saraptama ortalyǵynyń zerthanalary zamanaýı joǵary tehnologııalyq kóp fýnktsıonaldyq jabdyqtarmen jaraqtalǵan. Olarda klassıkalyq mıkrobıologııalyq jáne fızıkalyq-hımııalyq zertteýlerden basqa ónimniń jalǵandyǵyna zertteý júrgiziledi.
