Jandarbek Bekshın: Qyzylshaǵa shaldyqqandardyń kóbisi - ekpe almaǵandar

ASTANA. QazAqparat - Qyzylshaǵa shaldyqqandardyń kóbisi ekpe almaǵan balalar. QR Densaýlyq saqtaý mınıstrligi Qoǵamdyq densaýlyq saqtaý komıtetiniń basshysy Jandarbek Bekshın OKQ-de ótken baspasóz máslıhatynda osylaı málim etti, dep habarlaıdy QazAqparat tilshisi.

«Qazirgi ýaqytta elimizde qyzylshaǵa shyldyǵýdyń 900 jaǵdaıy tirkelgen. Olardyń negizgi bóligi - ekpe almaǵandar. Onyń ishinde 56% ekpe egý jasyna jetpegen balalar. Odan ári 30% qarsylyq bildirgender jáne 11% bas tartqandar. Ótken jyly vaktsınatsııadan 5 725 adam bas tartqan, degenmen medıtsına qyzmetkerleri azamattarmen jeke jumys jasap, 3106 adam óz pikirlerin ózgertip, vaktsınatsııa jasatty», - dedi ol OKQ-de ótken baspasóz máslıhatynda.

Sondaı-aq, bas sanıtar mindetti túrde vaktsınatsııa jasatý kerektigin alǵa tartty.

Onyń aıtýynsha, atalǵan aýrý túri búginde Eýropada órship tur.

«Birinshi sebep, biz jabyq keńistikte ómir súrmeımiz. 2017-2018 jyldary Eýropa aýmaǵynda 70 myńnan asa qyzylshamen aýyrý jaǵdaıy tirkeldi. Bul tek resmı derek boıynsha. Atap aıtqanda, Serbııada 5 myń, Ýkraınada 40 myń, Germanııa, Italııada 3 myńnan asa jáne Anglııa men Frantsııada 1 myńnan asa adm qyzylsha dertine shaldyqqan», - dedi J.Bekshın.