Jandarbek Bekshın koronavırýstyń ózgergen shtamy qalaı anyqtalatynyn aıtty
ALMATY. QazAqparat - Almaty qalasy bas memlekettik sanıtar dárigeri Jandarbek Bekshın onlaın brıfıng barysynda shetelden kelýshiler arasynda koronavırýstyń brıtanııalyq shtamy anyqtaldy ma degen suraqqa jaýap berdi, dep habarlaıdy QazAqparat tilshisi.
Onyń aıtýynsha, koronavırýstyń quramy men mýtatsııaǵa ushyraýyn jiti baqylap otyratyn arnaıy mamandar bar.
«Nur-Sultan qalasynda sońǵy úlgidegi jáne qazirgi zamanǵa saı zertteý júrgizetin «Sekvınator» degen aspap bar. Onymen zertteý jumystary qazir de júrip jatyr. Eýropa elderinen ózgergen shtamdar anyqtalmady. Bul jumysty respýblıkalyq vedomstvoaralyq komıssııanyń tapsyrmasy boıynsha kúsheıtip jatyrmyz. Bir aptadan keıin «Sekvınator» Almatyǵa da jetkizilip, ǵylymı zertteýler júrgiziletin bolady. Onyń basty maqsaty – ózgergen shtamdardy anyqtaý», - deıdi Jandarbek Bekshın.
Sonymen qatar, ol koronavırýs ınfektsııanyń keń taralǵan bes túri bar ekenin atap ótti.
«Bul bir brıtandyq, eki amerıkandyq, bir brazılııalyq shtamm jáne ońtústik afrıkalyq shtamm. Biz jańa shtamdardy anyqtaý úshin arnaıy júıe qurdyq. Zertteý nátıjeleri týraly kem degende eki aptadan keıin ǵana aıta alamyz. Búgingi kúnge deıin PTR testteriniń nátıjeleri boıynsha koronavırýstyń 145 túrlendirilgen túri anyqtaldy. Biraq, patogendik ózgerister anyqtalǵan joq», - dedi ol.
Aıta keteıik, Almaty qalasy bas memlekettik sanıtar dárigeriniń jańa qaýlysyna sáıkes ótken demalys kúnderi saýda úıleri, bazar jumysy men qoǵamdyq kólik toqtaǵan bolatyn.
