Jandarbek Bekshın koronavırýsqa qarsy vaktsına saldyrdy
ALMATY. QazAqparat – Búgin Almatydaǵy №5 qalalyq aýrýhanada densaýlyq saqtaý mekemeleriniń basshylary vaktsına saldyrdy, dep habarlaıdy QazAqparat tilshisi.
Qala ákiminiń orynbasary Erjan Babaqumarov, Almaty qalasynyń bas memlekettik sanıtarlyq dárigeri Jandarbek Bekshın jáne qalalyq densaýlyq saqtaý basqarmasynyń bastyǵy Narıman Tabynbaev alǵashqylardyń biri bolyp koronavırýsqa qarsy Spýtnık V» vaktsınasyn saldyrdy.
«Men múldem ýaıymdap turǵanym joq. Sebebi atalǵan vaktsına qaýipsizdiktiń birinshi kezeńinen sátti ótti. Reseıde eki mıllıonnan astam adam vaktsınalandy. Sondyqtan, alańdaýshylyq joq. Bul vaktsınanyń sapasyna, tıimdiligine esh kúmán keltirmeımin», - dedi Jadarbek Bekshın vaktsınatsııa aldynda.
Sonymen qatar, ol qazaqstandyq vaktsına QazCovid-In klınıkalyq synaqtardyń taǵy bir kezeńinen ótip jatqanyn aıtty.
Eske salaıyq, birinshi kezeńinde vaktsına ınfektsııalyq aýrýlardyń jedel medıtsınalyq kómek, jansaqtaý, qabyldaý bólimshesiniń qyzmetkerleri men sanıtarlyq epıdemıologııa qyzmetkerlerine salynady.
Ekinshi kezeńde jalpy bilim beretin mektep, joǵary jáne arnaýly orta bilim beretin oqý oryndarynyń muǵalimderi, medıtsınalyq qyzmetkerlerge egiledi.
Úshinshi kezeń 1 sáýirden bastalady. Ol kezde mektep, ınternat muǵalimderi, mektepke deıingi mekeme qyzmetkerleri, stýdentter men sozylmaly aýrýy bar naýqastar qamtylady.
Aıta keteıik, Reseıde daıyndalǵan «Spýtnık V» vaktsınasynyń 2050 dozasy keshe Almatyǵa jetkizilgen bolatyn.
Almaty qalasy ákiminiń orynbasary Erjan Babaqumarov halyqty ımmýndaýdyń mańyzdylyǵyn atap ótti.
«Vaktsınatsııa – bul pandemııamen kúrestegi sheshýshi qadam. Búgin men onyń mańyzdylyǵyn, qaýipsizdigin kórsetý úshin vaktsınany qabyldadym. Jaqynda ózimizdiń otandyq vaktsına egýge daıyn bolady. Biz ǵalymdarǵa senemiz. Sondyqtan men qala turǵyndaryna – barlyǵyna osy qadamdy jasaýǵa keńes beremin. Vaktsınalaý júrip jatqan kezde biz maska taǵýdy, áleýmettik araqashyqtyqty saqtaýdy jalǵastyrýymyz jáne vırýspen kúresýdiń basqa sharalaryn qoldanýǵa tıispiz», — dedi E. Babaqumarov.
