Jandarbek Bekshın koronavırýsqa ekspress-testileý qoldanysyn keńeıtýdi usyndy

ALMATY. QazAqparat - Almaty qalasynyń bas sanıtarlyq dárigeri Jandarbek Bekshın Óńirlik kommýnıkatsııalar qyzmetiniń baspasóz máslıhatynda ekspress-testiler joǵary tıimdi jáne az shyǵyndy ekenin aıtty, dep habarlaıdy QazAqparat tilshisi.

Jandarbek Bekshınniń aıtýynsha, koronavırýsqa qarsy antıgenge jedel testileý aýrýdy ýaqtyly anyqtaýǵa jáne onyń aýyr aǵymynyń yqtımaldyǵyn azaıtýǵa múmkindik beredi.

«Bul búkil álemde qoldanylatyn skrınıngilik ádis. ıAǵnı, 15 mınýt ishinde COVID-19 dıagnozyn tez anyqtaýǵa bolady. Bul koronavırýs kezinde - óte mańyzdy, ol kóptegen adamdarda tez ótedi jáne jaǵdaıy kúrt nasharlaıdy. Testileý PTR sııaqty ádisteme boıynsha júrgiziledi, biraq alynǵan bıomaterıal zerthanaǵa jiberilmeıdi, arnaıy eritindige ornalastyrylady.

Biz óz zertteýlerimizge súıene otyryp, jedel testilerdi qoldaný boıynsha usynystar daıyndadyq. Sáýirden qyrkúıekke deıin ınfektsııanyń ósý shyńynda biz 10 zerthana bazasynda naýqastar men óz betimen júgingen patsıentterde nazofarıngealdi jaǵyndylardyń 4319 úlgisin taldadyq, olardyń ekeýi Almatynyń ınfektsııalyq klınıkalarynda», - deıdi ol.

Zertteýde keshendi tásil qoldanyldy. Dástúrli PTR, sondaı-aq ártúrli álemdik óndirýshilerdiń on ataýynyń ekspress-testileri, onyń ishinde qazaqstandyq «ECO Pharm KZ» bar.

Mundaı ekspress-testiler SARS-CoV-2 antıgenin anyqtaýǵa ári ımmýnohromatografııa ádisine negizdelgen. Testiler SARS-CoV-2 koronavırýs ınfektsııasyn tez jáne dál joıýǵa nemese rastaýǵa múmkindik beredi, jas shekteýleri joq.

«Belgili sıpattamalary bar jeke shtamdy qoldaný valıdatsııany júrgizýge, ıaǵnı qozdyrǵyshtyń belgili kontsentratsııasy bar vırýstyq mádenıetti rastaýǵa múmkindik berdi. Dál osy vırýs otandyq QazVac vaktsınasyn jasaýǵa negiz boldy. Nátıjesinde biz ártúrli óndirýshilerdiń ekspress-testileriniń jańǵyrtylýy, ereksheligi jáne sezimtaldyǵy boıynsha senimdi sıpattamalardy aldyq», - dedi Jandarbek Bekshın.

Qalanyń bas sanıtarlyq dárigeriniń aıtýynsha, ekspress-testilerdiń sezimtaldyǵy óte joǵary, olardyń nátıjeleri halyqaralyq talaptarǵa sáıkes keledi. Olardyń ereksheligi PTR-ge qaraǵanda 1,5% kóp. Sonymen qatar, ártúrli óndirýshilerdiń ekspress-testileri klınıkalyq tekserý kezinde ártúrli kórsetkishterge ıe. Jedel testilerdiń negizgi mindeti – aýrýdyń kózi bolýy múmkin adamdardy múmkindiginshe tez anyqtaý jáne vırýstyń taralý tizbegin úzý.

Jandarbek Bekshın halyqtyń osal toptaryn, vahtalyq kásiporyndardyń qyzmetkerlerin, medıtsınalyq personaldy memlekettik shekaradan ótý kezinde, úıde, dárihanalarda, emhanalarda, jedel járdemde jedel testileýdiń sanyn arttyrý boıynsha jańa sharalardy qarastyrýdy usyndy.

Onyń pikirinshe, bul bıýdjet qarjysyn únemdep qana qoımaı, medıtsına qyzmetkerleriniń fızıkalyq shyǵyndaryn da azaıtady.