Jandarbek Bekshın: Qazaqstanda qyzylsha órship turǵan joq

ASTANA. QazAqparat - Qazaqstannyń bas memlekettik sanıtar dárigeri Jandarbek Bekshın Qazaqstanda qyzylshanyń jappaı taralmaǵandyǵyn aıtty, dep habarlaıdy QazAqparat tilshisi.

"Qazaqstanda qyzylshaǵa shaldyǵýdyń eń joǵar deńgeıi 2005 jyly tirkelip, 16 myń adam aýyrǵan bolatyn. Sońǵy ýshyǵý 2015 jyly oryn alyp, sol kezde Qazaqstannyń 1,5 myńnan astam turǵyny aýyrdy. Qazirgi ýaqytta qyzylsha órship tur deýge kelmeıdi. Ózderińiz de kórip otyrǵandaı, qyzylsha aıta qoıarlyqtaı ınfektsııa emes. Biz ony sımptomdyq emdeımiz. Eń bastysy dárigerge der ýaqytynda qaralý qajet", - dedi ol Úkimet otyrysynan keıin BAQ ókilderine.

Onyń dereginshe, búginge deıin elimizdiń aýmaǵyna qyzylshaǵa shaldyǵýdyń 700-den astam deregi tirkelgen.