Jandarbek Bekshın: Qaraǵandydaǵy menıngıt oqıǵasyna dúrligýdiń reti joq

ASTANA. QazAqparat - QR DSM Qoǵamdyq densaýlyq saqtaý komıtetiniń tóraǵasy Jandarbek Bekshın taıaýda Qaraǵandyda menıngıt oqıǵasynyń tirkelýine qatysty túsinik berdi, habarlaıdy QazAqparat.

«Atalǵan óńirde menıngıttiń bir ǵana jaǵdaıy tirkeldi. Osy aýrýdyń úsh túri bar ekenin bilesizder. Al Qaraǵandyda onyń eń jeńil túri, ıaǵnı «serozdy menıngıt» anyqtaldy. Ol emdeledi jáne osy aýrýdan bolatyn ólim-jitim óte tómen. Sondyqtan bul oqıǵaǵa baılanysty dúrligýdiń reti joq», - dedi J. Bekshın Astanada ótken baspasóz máslıhatynda.

Osy oraıda Bas sanıtarlyq dáriger atalǵan fakti boıynsha tıisti medıtsınalyq jáne epıdemıologııalyq sharalar júrgizilgenin atap ótti.

Budan buryn habarlanǵandaı, Qaraǵandydaǵy № 102 mektep-gımnazııanyń oqýshysy uıyma menıngıtke shaldyqqan bolatyn.