Jandarbek Bekshın ınfektsııaǵa beıim elderdi atady

NUR-SULTAN. QazAqparat - QR Densaýlyq saqtaý mınıstrliginiń taýarlar men kórsetiletin qyzmetterdiń sapasy men qaýipsizdigin baqylaý komıteti tóraǵasynyń orynbasary Jandarbek Bekshın qazaqstandyq týrısterge qaı elderge barý qaýipti ekendigin aıtty, dep habarlaıdy QazAqparat tilshisi.

Ortalyq kommýnıkatsııalar qyzmetinde ótken brıfıngte bas sanıtar Jandarbek Bekshın qazaqstandyq týrıster úshin Batys Afrıka elderine barýdyń táýekelderi kóp ekenin aıtady.

«Eń birinshi men otandyq týrısterge Madagaskar memleketine barýǵa keńes bermes edim. Onda oba qatty taralyp jatyr. Odan keıin Kongo demokratııalyq memleketine barmaý kerek. Ebola, Kongo-Qyrym gemorragııalyq qyzbasy, sary qyzba sııaqty aýrýlar kóp taralǵan. Batys Afrıkanyń ózge de elderine barýdan tartyný qajet. Brazılııada da denge, ebola, sary qyzba indetteri tirkelip jatyr. Ásirese sary qyzba juqtyrý qaýpi joǵary. Degenmen, ınfektsııaǵa beıim eki el retinde Madagaskar men Kongo demokratııalyq memleketin atar edim», - dedi Jandarbek Beshkın.

Onyń aıtýynsha, sońǵy eki jylda Qazaqstanǵa Taıland, Úndistan, Sıngapýr jáne Vetnam elderinen Kongo- qyzbasynyń tasymaldanýy 10 ret, denge qyzbasynyń tasymaldanýy 9 ret tirkelgen.

«DDU asa qaýipti ınfektsııalar boıynsha álemde shıelenisken jaǵdaı saqtalatynyn aıtyp otyr. Byltyr 300 myń tyrysqaq tirkelip, 900 adam ólgen. 200-den astam kúıdirgi, 500-ge jýyq Kongo-Qyrym gemorragııalyq qyzbasy, 200-den astam sary qyzba, 300 myńǵa jýyq denge qyzbasy tirkelgen», -dedi komıtet ókili.