Jandarbek Bekshın «Ashyq» qosymshasyn paıdalana bastaǵan nysandardy tekserdi

ALMATY. QazAqparat - Almaty qalasynyń bas sanıtar dárigeri Jandarbek Bekshın QR-kod júıesin pılottyq rejımde paıdalanatyn birqatar nysandy aralady, dep habarlaıdy QazAqparat tilshisi.

Almatyda QR-kod júıesin 27 kásipkerlik nysan engizdi. Onyń arasynda qoǵamdyq tamaqtaný oryndary, fıtnes-ortalyqtar, saýnalar, monshalar taǵy basqalary bar.

«Ashyq» qosymshasynyń artyqshylyǵyn paıdalanǵan alǵashqy kásipkerlerdiń biri - «Qazaqstan» sport kesheniniń dırektory Aıdana Satova.

Kásipker óz nysany úshin QR-kodty aqpan aıynyń ortasynda aldy.

Onyń aıtýynsha, 5 myń turaqty klıenti bar jáne onyń ekeýi ǵana qosymshaǵa kúmánmen qaraǵan.

«Biz óz klıentterimizben sóılesemiz, olardyń densaýlyǵy mańyzdy. Kóp adam «siz basseınge kelýshilerdi qalaı basqarasyz?» dep ózi suraıdy. Shynynda da, biz júzgishterdi belgili bir jerde ustaı almaımyz, al «Ashyq» qosymshasynyń arqasynda keshen qyzmetkerleri men kelýshiler óz qaýipsizdigi úshin tynysh bola alady», - deıdi Aıdana Satova.

Almatynyń bas sanıtarııa dárigeri Jandarbek Bekshın qosymshany paıdalanatyn nysandardy aralap shyqty.

Sonymen qatar, ol tekserýge birneshe sekýnd ýaqyt ketetinin atap ótti. Smartfondy QR-kodqa júktelgen qosymshamen alyp, skanerleý jáne kirý jetkilikti.

«Ekranda statýstyń kúıleri kórsetiledi (kók, jasyl, qyzyl nemese sary). Shyǵý kezinde- shyǵýdy bekitý úshin QR kodyn skanerleý kerek. Sonymen qatar, bul qosymsha mekemeniń jumys rejımin baqylaý úshin yńǵaıly. Qosymsha mekemedegi bir mezgilde kelýshilerdiń sanyn jáne onyń jumys saǵattaryn taldaýǵa (ıesizdendirýge) múmkindik beredi. Osylaısha, monıtorıngtik tekserýler júrgizý qajettiligi azaıady», - deıdi Jandarbek Muhtaruly.

Aıta keteıik, «Ashyq» mobıldik qosymshasy QR-kodty paıdalaný jáne PTR ortaq bazasymen ıntegratsııalaý arqyly kelýshiniń mártebesin anyqtaýǵa, ıaǵnı koronavırýs tasymaldaýshy ma, joq pa degen saýaldy naqtylaýǵa múmkindik beredi.