Jandarbek Bekshın Almatynyń «qyzyl» aımaqqa kirý sebebin túsindirdi
Onyń aıtýynsha, pandemııa bastalǵaly beri Almaty qalasynda koronavırýs ınfektsııasyn 21547 adam juqtyrdy. 1662 almatylyqtan koronavırýs pnevmonııasy anyqtaldy.
«Qańtar aıynyń 26 kúninde 3026 KVI jáne 237 pnevmonııa jaǵdaıy tirkeldi. Almaty qalasynyń qyzyl aımaqqa kóshýin kelesideı túsindiremiz, kez kelgen juqpaly aýrýdyń epıdemıologııalyq protsesi tolqyn tárizdi aǵymǵa ıe (órleý men quldyraýdyń kezektesýi) - COVID-19 epıdemııasy da osy zańdylyqqa baǵynady: Almatyda COVID-19 epıdemııasy bastalǵannan bastap naýryz – sáýir aılarynda alǵashqy tolqyn bastaldy (82 jáne 969 jaǵdaı), shilde aıynda 6 myńnan astam jaǵdaı tirkelip tolqynnyń shyńyna jetti, qyrkúıek aıynda 165 jaǵdaıǵa deıin tómendedi. Qazan aıynan bastap (366 jaǵdaı) aýrýdyń ósýi bastaldy (ekinshi tolqyn), qazirgi ýaqytta sol jalǵasýda»,- deıdi Jandarbek Bekshın.
Sonymen qatar, ol 31 jeltoqasannan bastap koronavırýs juqtyrǵandardyń sany kúrt ósip jatqanyn aıtty.
«Almaty qalasyndaǵy KVI boıynsha epıdemıologııalyq jaǵdaı sońǵy 4 kúnde kúrt nasharlady, kúnine 125-132 jaǵdaı tirkelip jatyr. KVI jaǵdaılaryn epıdemıologııalyq tekserý barysynda qoǵamdyq oryndarda naýqastardyń 40%-y, qoǵamdyq kólikte naýqastardyń 20% - y, sondaı-aq aýyrǵandardyń otbasylardyń 28% - y juqtyrǵany anyqtaldy. Sońǵy 3 aptada otbasylyq is-sharalarda (toı jáne otbasylyq is-sharalar j.t.b.) sondaı-aq kınoteatrlar men teatrlarǵa barǵan kezde juqtyrǵan jaǵdaılarda tirkeldi»,- deıdi ol.
KVI joǵary aýrýshańdyǵy 20-39 jas aralyǵyndaǵy azamattar arasynda 35% deńgeıinde, 40-59 jas aralyǵynda 27-28% deńgeıinde tirkelýde, bul saýda obektilerine (saýda oıyn-saýyq ortalyqtary, saýda úıleri, bazarlar) men qoǵamdyq tamaqtaný oryndaryna barý jáne qoǵamdyq kólikti paıdalanýmen baılanysty.
«Almaty qalasynyń departamenti áleýmettik qashyqtyqty, maska-qolǵap rejımin saqtaý, adamdar kóp jınalatyn jerlerden aýlaq bolý qajettiligi týraly halyqty eskertý boıynsha júıeli túrde jumys júrgizýde. Biz qyzyl aımaqqa sáıkes shekteý sharalaryn engizý boıynsha QR BMSD qaýlysyn mindetti túrde iske asyrý sheńberinde jumys isteımiz»,- dedi qalanyń bas memlekettik sanıtar dárigeri.
Eske salsaq, 27 qańtardaǵy epıdemıologııalyq ahýaldy baǵalaý matrıtsasy boıynsha Qazaqstannyń 6 oblysy men 2 qalasy áli de «qyzyl» aımaqta tur. Olar: Aqmola, Pavlodar, Atyraý, Qostanaı, Soltústik Qazaqstan, Batys Qazaqstan oblystary men Nur-Sultan jáne Almaty qalalary.
