Jandarbek Bekshın almatylyq dárigerlerdiń koronavırýsty qalaı juqtyrǵanyn túsindirdi

ALMATY. QazAqparat – Almatyda ótken onlaın brıfıng barysynda qalanyń bas memlekettik sanıtar dárigeri Jandarbek Bekshın júrgizilip jatqan epıdemıologııalyq tekserýdiń aralyq qorytyndysyn aıtty, dep habarlaıdy QazAqparat tilshisi.

Qalanyń bas sanıtar dárigeri medıtsına qyzmetkerleriniń jappaı vırýs juqtyrýyna baılanysty epıdemıologııalyq tekserý áli aıaqtalmaǵanyn aıtty.

«Bul jerde aýrýhananyń ınfektsııalyq aýrýlardy emdeýge ruqsaty bolmasa da, em júrgizgeni anyqtaldy. Eń birinshi juqtyrǵan adamdy da taptyq. Infektsııa eń birinshi dıagnostıkalyq bólimnen taraǵan dep tuspaldap otyrmyz. Eń birinshi aýyrǵan adamdar osy jaqtan shyqqan. Osy jerge kt, ýzd jasaýǵa kelgen adamnan onyń qasynda júrgen medbıkege juqqan. Ol patsıenttiń otbasyndaǵy 13 adam túgel tekserildi. Olardyń nátıjesi vırýs juqtyrǵanyn rastamady», - dedi Jandarbek Bekshın.

Onyń aıtýynsha, bul aýrýhanada koronavırýs juqtyrǵan naýqastar oqshaýlanǵan. Memlekettik mekemelerge habarlamastan qabyldaý bóliminde pnevmonııaǵa shaldyqqan 5 tósek orynnan artyq ızolıator ashylǵan.

«Bul aýrýhana ınfektsııalyq naýqastardy emdegen. Bul qyzmetke ruqsaty bolmasa da. Qabyldaý bóliminde naýqastardy oqshaýlaǵan. Beınekameradaǵy kadrlarǵa sensek, qyzmetkerler aýrýhananyń ishinde qorǵanys quraldarynsyz emin-erkin aralap júrgen. Bunyń barlyǵy jappaı juqtyrýǵa ákeledi. Qazir bólimderdiń barlyǵy jekelendi. Endi osydan keıin juqtyrý kórsetkishi túsedi degen oıdamyz», - dedi J.Bekshın.

Aıta ketý kerek, 2020 jylǵy 18 sáýirde Jandarbek Bekshın Almaty qalasynyń bas sanıtar dárigeri qyzmetine taǵaıyndalǵan bolatyn.