Jandarbek Bekshın: Almatyda koronavırýsqa qarsy ujymdyq ımmýnıtet 56 paıyzǵa jetti

ALMATY. QazAqparat - Almatyda koronavırýsqa qarsy ujymdyq ımmýnıtet qala halqynyń 56 paıyzǵa jetti. Bul týraly brıfıng barysynda qalalyq sanıtarııalyq-epıdemıologııalyq baqylaý departamentiniń basshysy Jandarbek Bekshın málim etti, dep habarlaıdy QazAqparat tilshisi.

«Búgingi kúni qalada koronavırýsqa qarsy ujymdyq ımmýnıtet 56% - ǵa jetti. (vaktsınatsııalanǵandardyń 48% - y jáne aýyryp jazylǵan adamdardyń 8% - y), vaktsınatsııa qarqyny táýligine 0,1% - dy quraıdy. 2022 jyldyń mamyr aıynda, ıaǵnı 6 aıdan keıin 75% - ǵa qol jetkizetin bolamyz»,- dedi Jandarbek Bekshın.

Sonymen qatar, ol vaktsınatsııalanǵan jáne aýyryp jazylǵan adamdarda 6-9 aı ótkennen keıin antıdenelerdiń tómendeýi baıqalatynyn aıtty.
«Almatyda vaktsınanyń eki komponentin alǵandar arasynda KVI – diń 2680 jaǵdaıy (vaktsınatsııanyń 21 kúninen keıin) jáne aýyryp jazylǵan adamdar arasynda KVI-diń 360 qaıtalama jaǵdaıy (aptasyna 10 jaǵdaı) tirkeldi, bul vaktsınatsııanyń baıaý qarqynymen qatar COVID-19 vırýsy delta shtamynyń mýtatsııalanýy jáne indettiń jańa órshýine jaǵdaı jasaıdy. Vırýstyń kezekti mýtatsııasynyń aldyn alý úshin vaktsınatsııalanǵan halyqty aǵymdaǵy jyldyń 22 qarashasynan bastap shuǵyl qaıta vaktsınatsııalaý qajet»,-dedi ol.