Jandarbek Bekshın adam toly avtobýsqa minbeýge keńes berdi
ALMATY. QazAqparat - Almatynyń bas sanıtarlyq dárigeri Jandarbek Bekshın qala turǵyndaryna adam toly avtobýstarǵa otyrmaýǵa keńes berdi, dep habarlaıdy QazAqparat tilshisi.
Qoǵamdyq kólikter halyqty oryndyqtarǵa otyrǵyzyp qana tasymaldaýy kerektigi týraly qaýly saqtalmaı jatqanyn onlaın brıfıng barysynda jýrnalıster aıtty.
«Ia, bul qaýlyny saqtaý qıyn bolyp tur. Kondýktorlar joq bolǵandyqtan, bul protsesti retteý ońaı emes. Avtobýstar jolaýshylardy toltyryp alyp júrmeýi kerek. Jolaýshylardan adam toly avtobýsqa minbeýdi suraımyz. Qoǵamdyq kólikte otyratyn oryn sanynan artyq adam bolmaýy kerek», - dedi ol.
Bas sanıtarlyq dáriger karantın sharalarynyń saqtalýyn polıtsııa baqylaıtynyn eskertti.
«Jolaýshylar ózderi qashyqtyq saqtaýy kerek. Avtobýs júrgizýshilerine talapty oryndaý óte qıyn. Sondyqtan, biz jolaýshylardyń túsinistigine senemiz», - dedi ol.
