Jandar Asan: Jańa Konstıtýtsııa jobasynyń ózegi – adam quqyǵy

ASTANA. KAZINFORM - Eń mańyzdysy, jańa Konstıtýtsııa jobasynyń ózegi – árbir qazaqstandyqtyń quqyǵy men bostandyǵy. Adam quqyqtary men bostandyqtary búkil júıeniń irgetasy.

Bul logıka boıynsha memleket óz múddesi úshin emes, azamattyń qadir-qasıeti, qaýipsizdigi jáne ózin ashý múmkindigi úshin qyzmet etedi. Bul týraly belgili saıası sarapshy, kommýnıkatsııa mamany Jandar Asan aıtty.

- Jańa Konstıtýtsııa jobasy – ótkenniń qısynynan shyǵyp, postkeńestik keńistikten tys, zamanaýı memleket modeline kóshýge jasalǵan talpynys. Birinshiden, ol keńestik stılden – aýyr, óktem, bıýrokratııalyq tilden bas tartady. Onyń ornyna Konstıtýtsııany sheneýnikterge arnalǵan nusqaýlyq emes, qoǵamnyń ortaq kelisimi retinde túsindiretin aıqyn ári túsinikti logıka qalyptasady», – dep atap ótti Jandar Asan.

Onyń aıtýynsha, jańa model anaǵurlym teńgerimdi. Onda tejemelik ári tepe-teńdik prıntsıpi nyǵaıtylady, ınstıtýttardyń róli naqtylanady, bıliktiń bir ortalyqqa shoǵyrlanýy azaıady.

- Konstıtýtsııa alǵash ret ózimizdiń kim ekenimizdi jáne ereksheligimizdi kórsetedi. Ulttyq ereksheligimiz, ótken tarıhymyz, qoǵamdyq qundylyqtarymyz basty orynǵa qoıylady. Bul jaı deklaratsııa emes, kim ekenimizdi jáne qaıda bet alǵanymyzdy zań turǵysynan bekitý. Eń mańyzdysy, jańa Konstıtýtsııanyń tórinde – adam tur. Adam quqyqtary men bostandyqtary búkil júıeniń irgetasy. Bul logıka boıynsha memleket óz múddesi úshin emes, azamattyń qadir-qasıeti, qaýipsizdigi jáne ózin ashý múmkindigi úshin qyzmet etedi, – dedi Jandar Asan.

Osyǵan deıin Konstıtýtsııa jobasyna qatysty Májilis depýtaty Abzal Quspannyń pikirin bergen edik.