Jańbyrly kúni nelikten aǵashtar sýarylyp jatyr – «Astana Zelenstroı» túsindirdi
NUR-SULTAN. QazAqparat – Elordada jańbyrly kúni aǵash sýarǵan vıdeo áleýmettik jelige tarady. Osyǵan baılanysty qala ákimdigi «Astana Zelenstroı» JShS jaýabyn jarııalady, dep habarlaıdy QazAqparat tilshisi.
«Astana Zelenstroı» kompanııasy jasyl jelekti azyqtandyrý máselesine qatysty túsinik berdi.
«Astana-Zelenstroı» JShS aǵashtardyń tamyr júıesine mıneraldy tyńaıtqyshtar jiberý jumysyn júrgizip jatyr. Bul protsedýra tek bultty jáne jańbyrly aýa raıynda jasalady», - dep habarlady kompanııa.
Kompanııanyń aıtýynsha, jaqsy nátıjege qol jetkizý úshin mıneraldy keshendi tyńaıtqyshtar ylǵaldy topyraqqa qoldanylady.
Tyńaıtqysh sýda erıdi jáne sýarý kólikterinen shashylady.
Buǵan deıin habarlanǵandaı, Nur-Sultanda sońǵy kúnderi qatty jańbyr, burshaq jáne naızaǵaı bolady. Búgin jel ekpini 20 m/s deıin kúsheıedi dep kútilip otyr.
Vıdeodan alynǵan kadr
