Jańbyrdan ábigerge túsken aqtóbelikter ákimdikten kómek surady
AQTÓBE. QazAqparat - Aqtóbe oblysy, Embi qalasyndaǵy kópqabatty úı turǵyndary jańbyrly kúni úıin tastap, dalaǵa shyǵady. Osylaı ábigerlengen olar ákimnen kómek surady, dep habarlaıdy QazAqparat tilshisi.
Embi qalasyndaǵy turǵyndar bir kezderi kópqabatty úıdi tastap ketip, sońǵy jyldary qaıta qonystandy. Degenmen bul qalada taǵy eki kópqabatty úı bos tur. Al óz kúshterimen páterin jóndep alǵan turǵyndar jazda sýsyz otyrady, qystan tońyp shyǵady. Al jańbyrly kúni tóbeden sý sorǵalaıdy, tok soǵý qaýpi de bar.
«Kópqabatty úıde 6 jyldan beri turamyn. Úıimizdiń syrty qaptalmaǵan, tóbesi jabylmaǵan. Kúz ben kóktemde tóbemizden sý aǵyp, mazamyzdy alyp tur. Jyl saıyn 15-20 myń teńgeden aqsha jınap, tóbemizdi jamap qoıamyz. «Termojańǵyrtý» baǵdarlamasyna kelisemiz, nesıe tólesek te bolady. Jyl saıyn ákimdikke baramyz, olar ýáde berýden sharshaǵan emes», - qala turǵyny Qalamqas Kósherbaeva.
Embi qalasyndaǵy kópqabatty úıde jylý jıi toqtatylady. Sebebi, jertóledegi qubyrlar shirip, sý ketip qalady.
«Ózim zeınetkermen, medbıke bolyp jumys istedim. Bul úıde 1985 jyldan beri turamyn. Jyl ótken saıyn úıimizdiń jaǵdaıy ketip, hali múshkil kúıge tústi. Shatyrdy jóndeýge ózimiz aqsha jınaımyz. Ákimdikke barǵan kezde 100 myń teńgeden jınap, nesıe alý joldaryn usyndy. Jylý bolmaǵan kúni pesh qosamyz»,- dedi kópqabatty úı turǵyny Galına Nosareva.
Osy úıde 2011 jyldan beri turatyn Mádına Aımaǵambetova tóbeden sý aqqan kezde tok soǵyp, dalaǵa qashyp shyǵatynyn aıtyp berdi.
Embi qalasynyń ákimdigi ǵımaratyna jaqyn ornalasqan kópqabatty úıdiń máselesi aldaǵy jyldary sheshilýi múmkin.
«Úıdi qalpyna keltirýge arnalǵan jumysty ákimdik óz qolyna aldy. Aýdandyq turǵyn úı-kommýnaldyq sharýashylyq bólimi jobalyq-smetalyq qujat daıyndap, keler jyly memlekettik-jekemenshik seriktestik aıasynda jóndeledi. Bul úıdiń birinde 20-30 otbasy bar. 5 qabatty úıdiń 4-qabatynda ǵana adamdar turady. Shynyn aıtqanda bul úıdiń dál osylaı bos turǵanyna 25 jyl boldy. 1994 jyly adamdar tastap ketti», - dedi Embi qalasynyń ákimi Álimjan Qorǵanbaı.
Aıta keteıik, bul úıdi jergilikti kásipkerlerdiń biri memlekettik-jekeshelik áriptestik aıasynda jóndelýi múmkin. Úsh jyldyq jospar iske assa munda kezekte turǵan adamdar qonystanady. Muǵaljar aýdan boıynsha 250-den astam adam páter kezeginde tur.
