Jańbyr, jel – 18 sáýir kúngi aýa raıy boljamy
NUR-SULTAN. QazAqparat – 18 sáýirde Qazaqstannyń ońtústik, ortalyq jáne soltústik óńirlerine ońtústik tsıklon jyrasy áser etedi, osyǵan baılanysty jańbyr kútiledi. Eldiń ońtústiginde, onymen qosa naızaǵaı oınap, shańdy daýyl turady. Barlyq óńirde jel kúsheıip, batysta, soltústik-batysta tuman baıqalady. QazAqparat bul týraly Qazgıdrometke silteme jasap habarlaıdy.
Atap aıtqanda, kúndiz Túrkistan oblysynyń batysynda, ońtústiginde, taýly, taý bókterli aýdandarynda naızaǵaı, daýyl kútiledi. Tańerteń jáne kúndiz soltústikte, batysta shańdy daýyl turyp, soltústikte, batysta, taýly, taý bókterli aýdandarda jel 15-20 m/s kúsheıedi.
Qyzylorda oblysynyń ortalyǵynda jel 15-20 m/s artady. Tańerteń jáne kúndiz óńirdiń ońtústiginde, shyǵysynda naızaǵaı boljanady.
Kúndiz Jambyl oblysynyń taýlarynda naızaǵaı, soltústik-shyǵysta, taýly aýdandarda jel 15-20 m/s artady.
Shyǵys Qazaqstan oblysynyń ońtústiginde, ortalyǵynda, kúndiz Mańǵystaý oblysynyń soltústik-batysynda, Qaraǵandy oblysynyń ońtústiginde, Aqmola oblysynyń ońtústik-shyǵysynda jeldiń kúshi 15-23 jetedi.
Almaty oblysynyń Jalańashkól aýdanynda jel 15-20, ekpini 25 m/s kúsheıedi.
Atyraý, Qostanaı oblystarynyń batysynda, túnde Aqtóbe oblysynyń soltústiginde, batysynda, ortalyǵynda tuman bolady.
