Jańbyr jaýsa, úıleri sýdyń astynda qalatyn Almaty turǵyndarynyń máselesi qalaı sheshilmek
ALMATY. QazAqparat - Almaty qalasy Jetisý aýdanynyń ákimi Gúlnar Kókebaeva qalalyq qoǵamdyq keńestiń otyrysynda aýdanda jaýyn jaýsa, sýdyń astynda qalatyn úılerdiń máselesin qalaı sheshetinderin aıtty, dep habarlaıdy QazAqparat tilshisi.
«Bizdiń Jetisý aýdanynda úılerdi sý basý problemasy bar. Bul ásirese jumysshy aýylyna qatysty. Biz jańbyr jaýaǵan saıyn osy problemaǵa tap bolamyz. Bul máseleni keshendi túrde sheshemiz. Bıyl tórt shaqyrym aryq jelisi jóndeledi. Baıqaý ótti. Merdiger anyqtaldy. Jumys bastaldy», - dedi aýdan ákimi.
Onyń aıtýynsha, jasyl qordy kóbeıtý úshin aýdanda 20 myń aǵash otyrǵyzylady.
Sonymen qatar, bıyl aýdanda uzyndyǵy 18 shaqyrym bolatyn 10 kóshe jańartylady. 8 shaqyrymnan astam káriz jelisi tóseledi, 29,3 shaqyrym elektr jáne sýmen jabdyqtaý jelileri qaıta qalpyna keltiriledi.
