Jańbyr, shańdy daýyl, burshaq — 30 tamyzda elimizde kún raıy qalaı bolady?

ASTANA. QazAqparat - Qazgıdromet Qazaqstan aımaqtarynda 2023 jylǵy 30 tamyzda bolatyn qaýipti meteorologııalyq qubylystarǵa boljaý konsýltatsııasyn jarııalady, dep habarlaıdy QazAqparat.

QR basym bóliginde atmosferalyq frontaldy bólimderdiń ótýine baılanysty aýa-raıynyń turaqsyz sıpaty saqtalady, jańbyr jaýady, soltústik-batysta, soltústikte, ońtústikte naızaǵaı, ekpindi jel, qatty jańbyr kútiledi, burshaq jaýýy múmkin. Eldiń ońtústik-batysynda - shańdy daýyl. QR soltústik-batysynda, soltústiginde, ońtústik-shyǵysynda tuman kútiledi.

Jambyl, Qyzylorda oblystarynda, Atyraý oblysynyń batysynda, shyǵysynda, Almaty oblysynyń soltústik jartysynda, Aqtóbe oblysynyń batysynda, ońtústiginde tótenshe órt qaýpi kútilýde.

Batys Qazaqstan oblysynyń soltústiginde, ortalyǵynda joǵary órt qaýpi, oblystyń ońtústik-batysynda, soltústik-batysynda, shyǵysynda tótenshe órt qaýpi saqtalady.

Pavlodar, Qaraǵandy, Qostanaı oblystarynda, Ulytaý oblysynyń ońtústiginde, Abaı oblysynyń batysynda, soltústiginde joǵary órt qaýpi saqtalady.