Jańbyr saldarynan Astanada masalardy joıý múmkin bolmaı otyr
ASTANA. 9 tamyz. QazAqparat - Astanada kúnde jańbyr jaýatyndyqtan dezınsektsııa jumystary toqtap tur.
Bul týraly astana.kz saıtyna «Elordalyq dezınfektsııa» JShS habarlady.
Atalǵan jumystar aýa raıyna qaraı aıyna bir ret sáýir-qyrkúıek aralyǵynda júrgiziledi. Sáýirde kún jylynǵannan keıin dezınsektsııalyq jumystar qolǵa alyndy.
Vedomstvonyń habarlaýynsha, jaýyn-shashynnyń saldarynan óńdeýdiń birinshi kezeńin ótkizý qıynǵa soqqan. Keste jospary buzylyp, óńdeý júrgizilgen joq. Sondyqtan dezınsektsııanyń birinshi kezeńi mamyrdyń 14-inde emes, 20-synda aıaqtaldy. 21 mamyrdan bastap ósimdikterdi óńdeýdiń ekinshi kezeńi bastalǵan. Jańbyr jaýyp, qatty jel turǵandyqtan ol da toqtap qaldy. 17 maýsym - 23 shilde aralyǵynda óńdeýdiń úshinshi kezeńi ótti. Sońǵy týr 12 shildede bastalyp, jospar boıynsha 24 shildede aıaqtalýy tıis edi. Biraq nóser jańbyrǵa baılanysty toqtatyldy.
Kún ashylǵanda osy baǵyttaǵy jumystar jalǵasady. Mamandardyń aıtýynsha, elordada masanyń ekzo jáne endofıl syndy eki túrimen kúres júrgiziledi.
«Búgingi tańda Astanada 2500 lıtrge jýyq hımııalyq zat paıdalanyldy. Tsıperhlor preparaty normatıvterge sáıkes 0,350 ml esebimen 1 ga jerde qoldanylady», - delingen aqparatta.
Eske salaıyq,dezınsektsııalyq sharalar elordanyń ornalasýy men klımatyna baılanysty júrgiziledi, jer batpaqty, qamys ósip, jer asty sýlary kóptep jınalatyndyqtan jertólelerdi sý basyp, masalar kóbeıedi. «Sondaı-aq, tamyz aıynyń basynda jaýyn-shashyn mol tústi. Al jańbyr masalardyń kóbeıýine qolaıly orta bolyp tabylady jáne dezınsektsııalyq jumystardy júrgizýge kedergi jasaıdy. Budan basqa, jańbyrdan qalyńdap ósken ósimdikter masalardyń tyǵylýyna qolaıly orta bolyp tabylady. Masalardyń qashan joıylatynyn naqty aıtý qıyn. Kún sýyǵanda daladaǵy masalar óledi, al jertólelerdegi masalar qolaıly ortada qysta da tirshilik ete alady», deıdi mamandar.
