Jańbyr men qar sýy Esilge aǵyzar aldynda tazartylady - Altaı Kólginov
«Qurylys júrgizip, ınjenerlik jelini tartý barysynda jaýyn-shashyn kárizderi men kollektorlardy da umytpaǵan jón. Olardy tazartyp, qaraýsyz qalǵan jaýyn-shashyn kárizderi men aryq júıesin balansqa alyp, jaýyn-shashyn qubyrlaryna zańsyz jalǵanýdy anyqtap, t.s.s. jumystardy josparly túrde júrgizý kerek.
Jarty jyl ishinde ótkizý qabiletin jaqsartý maqsatynda 54 shaqyrym kollektor, 4 myń jańbyr sýyn jınaý jáne qadaǵalaý qudyǵy, 32 myń metr aryq júıesi tazartyldy. Aryqtar men qudyqtardan shyǵarylǵan qoqystyń ózi 2,5 myń tonna boldy, osyndaı jumys kóp. Jaýyn sýy aǵatyn qubyrlarǵa 230 úı-jaıdyń zańsyz jalǵanǵany anyqtaldy. Bul jumys turaqty atqarylyp keledi», - dedi Altaı Kólginov.
Onyń aıtýynsha, «Jastar» aýdanyndaǵy, ıaǵnı J.Táshenov pen Amman kósheleriniń qıylysyndaǵy tazartý qondyrǵysynyń qurylysy jaýyn-shashyn kollektorlarynyń rekonstrýktsııasyn da qamtıdy.
«Búgingi aralaý barysynda «Jastar» aýdanyndaǵy (J.Táshenov pen Amman kósheleriniń qıylysy) tazartý qondyrǵysynyń qurylysymen tanystym. Bul qurylys kelip turǵan jaýyn-shashyn kollektorlarynyń rekonstrýktsııasyn da kózdeıdi. Bul jobany biz eki kezeńde júzege asyramyz.
Birinshi kezeńi - byltyrǵy kúzde bastaldy. Buryn qaldyq sý ózenge tikeleı aǵyzylyp, ony lastap, qala ekologııasyna keri áserin tıgizetin. Josparymyz júzege asqan soń, endi jańbyr men qar sýy Esilge aǵyzar aldynda tazartylatyn boldy», - dedi qala ákimi.
Altaı Kólginov bıylǵy kóktemde bul jospardyń ekinshi kezeńi aıaqtalatynyn atap ótti.
«Nátıjesi – jaýyn-shashyn kollektorlary rekonstrýktsııalanady. Jańa qondyrǵylardyń qýaty táýligine 42 myń tekshe metr. Bul qondyrǵylar J.Táshenov, Baraev, Sh.Ýálıhanov, Sh.Imanbaeva jáne Respýblıka dańǵylyn sý basýdan saqtaıdy.
Qondyrǵylar jer astymen júrgizilip, al ústine - kishi arhıtektýralyq músindermen kómkerilgen ári jasyl jelekti skver salamyz.
Sonymen birge, B. Momyshuly kóshesindegi problemaly jerge jaýyn-shashyn káriz júıesiniń magıstraldyq kollektorynyń qurylysy aıaqtaldy. Jańa qondyrǵy qazirgi jaýyn-shashyn kárizderiniń ótkizý qabiletin 1,5 esege arttyrady», - deıdi ákim.
Al Telman turǵyn alabynyń tazartý qondyrǵylary men magıstraldy kollektorynyń ótkizý qabileti táýligine 36 myń tekshe metr bolmaq.
«Joba júzege asqan soń - osy alaptyń jáne № 27 kósheniń qurylys júrýi múmkin aýmaqtarynan jańbyr sýyn aǵyzyp áketý múmkin bolady. Buǵan qosa, birshama tazartý qondyrǵylary men jaýyn-shashyn kárizderi basqa jerlerge de salyndy. Bul jumystar júıeli túrde júrgizilip keledi», - dedi Altaı Kólginov.
