Janbota Aldabergenova sporttyq mansabyn aıaqtaǵanyn habarlady

ASTANA. KAZINFORM — Frıstaıl-akrobatıkadan Qazaqstan quramasynyń kóshbasshylarynyń biri, Álem kýbogy kezeńderiniń júldegeri Janbota Aldabergenova sporttyq mansabyn aıaqtaý týraly sheshim qabyldady. Bul týraly UOK habarlady. 

 — Ár bastalǵan nárseniń óz sońy bar. Men óz sport túrime áýede qalyqtaýdyń lázzatyn syılaǵany úshin sheksiz rızamyn. Bul sezimdi qatty saǵynatyn bolamyn! Maǵan álemdi kórý múmkindigin bergeniń úshin rahmet. Rýhy myqty, erekshe jandarmen tanystyrǵanyń úshin alǵys aıtamyn. Komandama barlyq eńbegi men qoldaýy úshin, sondaı-aq meniń sporttyq jolymda birge júrgen barsha janǵa úlken rahmet, — dedi sportshy.

Janbota Aldabergenova mansabynda ár deńgeıdegi 125 jarysqa qatysyp: Úsh qysqy Olımpıada oıyndaryna, segiz álem chempıonatyna, 54 Álem kýbogynyń kezeńine, tórt jasóspirimder arasyndaǵy álem chempıonatyna qatysqan.

— Jalpy, 14 ret jeńimpaz atanyp, 33 ret jeńis tuǵyryna kóterildim. Ókinishke qaraı, Olımpıada oıyndarynda medal jeńip alý buıyrmady. Demek, Qazaqstanda bul tarıhı jetistikke jetetin sportshy men emes bolǵanym ǵoı. Degenmen, elimizdiń frıstaıl-akrobatıkasyna úlken úles qosqanymdy jáne osy sport túrinde ázirge eshkim jetpegen nátıjege qol jetkizgenimdi maqtanyshpen aıta alamyn (maqtanǵanym emes, bul shyndyq). Men Qazaqstanda Olımpıada chempıony shyǵatynyna senemin jáne soǵan úlken úmit artamyn. Al mansabymdy aıaqtaýymnyń basty sebebi — ótken maýsymnyń jeltoqsanynda alǵan jaraqatym (jambasymnyń shyǵýy). Densaýlyq men úshin qazir bárinen mańyzdy, — dep jazdy Aldabergenova.

Aıta ketelik jaqynda Almaty qalasynda frıstaıldan Álem Kýbogynyń kezeńi aıaqtalǵan edi.