Janbota Aldabergenova akrobatıkadan álem kýbogi kezeńinde úzdik úshtikke endi
Qazaqstan ulttyq quramasynyń múshesi Janbota Aldabergenova Fınlıandııanyń Rýka qalasynda frıstaıl-akrobatıka men mogýldan ótken álem kýboginiń alǵashqy kezeńinde úzdik úshtikten kórindi, dep habarlaıdy Kazinform.
Sportty damytý dırektsııasynyń baspasóz qyzmetinen málim etkenindeı, akrobatıkadan óner kórsetken Janbota fınalda 77.43 ball jınap, qola júldeger atandy.
Altyndy Beıjiń olımpıadasynyń (aralas komandalyq syn) qola júldegeri Marıon Teno (Kanada) jeńip alsa, kúmis aýstralııalyq Danıel Skottyń enshisinde ketti. D.Skot buǵan deıin álem chempıonatynda 2 márte kúmiske ıe bolǵan.
Bir qyzyǵy, qazaq sportshysy týra bir jyl buryn osynda ótken 2022-2023 jylǵy maýsymdaǵy álem kýboginiń betashar kezeńinde de qola alǵan edi. Ol kezde J.Aldabergenovaǵa 80,04 upaı jetkilikti bolǵan. Jalpy, Rýka qalasy bıyl FIS-tiń frıstaıl maýsymyn qatarynan 14-ret bastap berdi.
Frıstaıl-mogýlda ulttyq qurama sportshylarynan eń joǵarǵy satyǵa Pavel Kolmakov turaqtady. Ol jekeleı synda besinshi orynǵa taban tiredi.