Janbota Aldabergenova 2026 jylǵy Olımpıada oıyndarynda HOK saılaýyna úmitkerler tizimine endi
ASTANA.KAZINFORM – Halyqaralyq Olımpıadalyq komıteti (HOK) Mılan-Kortınada ótetin 2026 jylǵy Qysqy Olımpıada oıyndarynda HOK Sportshylar komıssııasyna saılaný úshin úmitker sanalatyn on bir sportshynyń tizimin jarııalady. Bul tizimge úsh Olımpıadaǵa qatysqan, Qazaqstan UOK Sportshylar komıssııasynyń múshesi, qazaqstandyq sportshy Janbota Aldabergenova da endi.
QR UOK málimetinshe, Janbota Aldabergenovanyń kandıdatýrasyn Qazaqstan Ulttyq Olımpıadalyq komıteti Sportshylar komıssııasymen birlese otyryp usynǵan. Aıta keteıik, bıyl bul saılaýǵa álemniń túkpir-túkpirinen júzdegen sportshy ótinish bildirgen. Alaıda, tek 11 sportshy ǵana HOK Atqarýshy komıtetimen maquldanyp, resmı kandıdattar qataryna endi. Janbota Aldabergenovanyń bul tizimge enýi – onyń kásibıligi men halyqaralyq deńgeıdegi bedeliniń aıqyn kórinisi.
Úmitkerler tizimine 11 elden jáne 5 túrli sport túrinen 8 er jáne 3 áıel sportshy engen. Janbotadan bólek úmitkerler qatarynda tómendegi sportshylar bar:
- Aleksandr Abramenko (frıstaıl, Ýkraına)
- Darıo Kologna (shańǵy jarysy, Shveıtsarııa)
- Ioan Gonsalvesh Gýtt (taý shańǵy sporty, Tımor-Leste)
- Han Tsýn (mánerlep syrǵanaý, Qytaı)
-Ilkka Herola (skandınavııalyq kombınatsııa, Fınlıandııa)
- Adam Konıa (shańǵy jarysy, Vengrııa)
- Magnýs Nedregotten (kerlıng, Norvegııa)
- Iohanna Talıherm (bıatlon, Estonııa)
- Marıel Tompson (frıstaıl, Kanada)
- Von ıÝndjon (bobsleı, Koreıa Respýblıkasy)
– Mundaı jaýapty rólge úmitker ataný – úlken qurmet. HOK Sportshylar komıssııasy – Olımpıadalyq qozǵalysta sportshylardyń únin jetkizetin eń joǵarǵy alań. Qazaqstandy jáne búkil álem sportshylaryn tanystyrý múmkindigine ıe bolǵanyma shyn júrekten qýanyshtymyn, – dedi Janbota Aldabergenova.
Saılaý 2026 jylǵy Qysqy Olımpıada oıyndary aıasynda 30 qańtar men 18 aqpan aralyǵynda ótedi. Daýys berýge Olımpıada oıyndaryna qatysatyn barlyq sportshylar qatysa alady. Nátıjeler 19 aqpanda, ıaǵnı jabylý saltanatyna úsh kún qalǵanda jarııalanady. Saılaý qorytyndysy boıynsha eki úmitker – ártúrli sport túrin usynatyn jáne eń kóp daýys jınaǵan sportshylar – segiz jyl merzimge HOK Sportshylar komıssııasynyń múshesi bolyp saılanady jáne HOK músheligine bekitiledi.
HOK Sportshylar komıssııasy sportshylardyń quqyqtary men múddelerin qorǵaýda, sondaı-aq olardy Olımpıadalyq qozǵalystyń sheshim qabyldaý barysyna qatystyrýda mańyzdy ról atqarady. Komıssııa músheleri HOK-niń ózge de birqatar komıtetteriniń jumysyna belsendi aralasady, al tóraǵasy HOK Atqarýshy keńesiniń quramyna enedi.
Janbota Aldabergenovanyń bul tizimge enýi – onyń sporttaǵy tabystarynyń moıyndalýy ǵana emes, Qazaqstannyń halyqaralyq Olımpıadalyq arenadaǵy belsendiliginiń aıqyn dáleli.
Aıta keteıik, Qazaqstan áıelder quramasy kúresten Majarstandaǵy týrnırge qatysady.