Janbolat Dildábekov: Prezıdenttiń dárigerler eńbegin baǵalaǵany - biz úshin zor mártebe
TÚRKІSTAN. QazAqparat - Prezıdenttiń dárigerler eńbegin baǵalaǵany - biz úshin úlken mártebe. Túrkistan qalalyq aýrýhanasynyń bas dárigeri Janbolat Dildábekov osylaı deıdi, dep habarlaıdy QazAqparat.
Bas dárigerdiń sózinshe, Memleket basshysynyń keshegi málimdemesi halyqtyń kókeıindegi kóp suraqqa jaýap berdi.
«Tótenshe jaǵdaıda túrli sebeppen jumyssyz qalǵan jastardy jumyspen qamtý, osy sátte ekonomıkanyń quldyramaýy, halyqtyń bankter aldyndaǵy bereshekterine jeńildik jasaý sııaqty tapsyrmalary - qazirgi tańdaǵy óte mańyzdy máseleler bolyp tur. Ásirese, «Eń bastysy - halyqtyń saýlyǵy» dep medıtsına mamandarynyń eńbegine erekshe toqtalǵany qýantty», - deıdi Janbolat Dildábekov.
Medıtsına mamany Nur-Sultan, Almaty qalasy sııaqty basqa da iri qalalardy karantınge jabý - óte oryndy sheshim bolǵanyn aıtady.
«Qazirgideı almaǵaıyp kezeńde biz barlyq saqtyq sharalaryn jasaýymyz kerek. Osy oraıda, men barlyq áriptesterimizdiń jankeshti jumystary úshin alǵysymdy bildirip, barlyq otandastarymdy osy baǵytta jumyla áreket etýge shaqyramyn. Ýaqytsha shekteýlerge shydamdylyq tanytyp, qaýip ústinde eńbek etip jatqan aq halattylarǵa qoldaý kórsetý kerek», - dep túıindedi sózin qalalyq aýrýhananyń bas dárigeri.
Eske sala keteıik, keshe Qasym-Jomart Toqaevtyń tóraǵalyǵymen tótenshe jaǵdaı jónindegi memlekettik komıssııanyń otyrysy ótken edi. Onda Prezıdent dárigerlerge alǵys aıtty.
«Sizderge shynaıy alǵysymdy aıtamyn. Úkimet pen ákimderge qosymsha qarjy taýyp, koronavırýsqa qarsy kúres jumystaryna tartylǵan dárigerlerge, polıtsııa qyzmetkerlerine jáne ózge de mamandarǵa 1 aılyq kóleminde syıaqy berýdi tapsyramyn», – dedi Memleket basshysy.
