Jańbyr jaýyp, naızaǵaı oınaıdy: 19 qyrkúıekke arnalǵan aýa raıy boljamy
ASTANA. KAZINFORM — «Qazgıdromet» RM 19 qyrkúıekke arnalǵan aýa raıy boljamyn jarııalady.
Sınoptıkterdiń boljamynsha, elimizdiń basym bóligi burynǵysynsha Ońtústik tsıklonnyń yqpalynda bolyp, jańbyr jaýyp, naızaǵaı oınaıdy.
— Elimizdiń soltústik-shyǵysynda qatty jańbyr jaýady, soltústik-shyǵys pen ortalyqta burshaq jaýýy múmkin. Tek respýblıkanyń batysynda, soltústik-batysynda jáne ońtústiginde soltústik-batys antıtsıklonynyń áserinen jaýyn-shashynsyz aýa raıy kútiledi. Respýblıka boıynsha jel kúsheıedi, túnde jáne tańerteń soltústik, shyǵys, ońtústik-shyǵys jáne ortalyq aımaqtarda tuman kútiledi, — delingen aqparatta.
Qostanaı oblysynyń soltústigi men shyǵysynda túnde -2°S aıaz bolady. Al Almatyda aýa temperatýrasy kúndiz +18+20 °S, jeldiń jyldamdyǵy 3-8m/s.
Jetisý oblysynda, Batys Qazaqstan oblysynyń soltústiginde, Aqtóbe oblysynyń soltústiginde, Mańǵystaý, Qostanaı oblystarynyń ońtústiginde joǵary órt qaýpi kútiledi.
Eske sala keteıik, Almatyda jańbyr kezinde 13 úıdi sý basqanyn jazǵan edik.
