Jańbyr, tuman: 8 sáýirge arnalǵan aýa raıy boljamy

ASTANA. KAZINFORM - Sınoptıkter 8 sáýirge arnalǵan aýa raıy boljamyn jarııalady.

«Qazgıdromet» RMK málimeti boıynsha, Qazaqstan aýmaǵynyń basym bóliginde atmosferalyq frontaldy bólikterdiń ótýine baılanysty aýa raıy qubylmaly bolady, jańbyr jaýady. Soltústik-batysta, soltústikte jáne ortalyqta túnde qar aralas jańbyr jaýady.

Respýblıkanyń ortalyǵynda jáne kúndiz soltústiginde nóser jaýyn jaýady dep boljanyp otyr. Tek ońtústik-batys pen ońtústik-shyǵysta aýa raıy jaýyn-shashynsyz bolady.

Sınoptıkterdiń boljamyna sáıkes respýblıka boıynsha tuman túsip, jel kúsheıedi. Eldiń soltústik-batysynda, shyǵysynda jáne ońtústiginde naızaǵaı oınaıdy, ońtústikte burqasyn bolady.