Jańbyr sýy aqqan vagon: jolaýshylar poıyzynyń tehnıkalyq jaıy tekseriledi
ASTANA. KAZINFORM — Áleýmettik jeliler men messendjerlerde Almaty – Qostanaı baǵytymen qatynap júrgen jolaýshylar poıyzyndaǵy qolaısyz jaǵdaıdy kórsetetin beınejazba tarady. Kadrlarda vagon ishine jańbyr sýynyń sorǵalap aǵyp jatqan sáti beınelengen.
Aldyn ala málimet boıynsha, bul poıyz «Jolaýshylar tasymaly» AQ-yna tıesili emes jáne «Qazaqstan temir joly» kompanııasyna qatysy joq. Atalǵan quram jeke menshik tasymaldaýshyǵa tıesili.
«Jolaýshylar tasymaly» AQ taratqan aqparatqa sáıkes, qazirgi tańda Qazaqstan aýmaǵynda temirjol arqyly jolaýshylar tasymalymen aınalysatyn 14 jeke operator bar. Olardyń qatarynda: «Túrksib Astana», «Sary-Arka Kompanı», «Maral Nur», «Solux Express», «Araı Trans KZ», «Nomadas», «ArlanTransAstana», «JeldorTransAqtóbe», «Otpan Logistic», «VagonServiceAlmaty», «KazRail», «Tengrı Ekspress», «PK «Týran-Ekspress» jáne «Promo plıýs» JShS bar.
QR Kólik mınıstrligi atalǵan fakti boıynsha resmı tekseris bastaǵanyn habarlady.
— Aldyn ala málimetke sáıkes, oqıǵa Almaty – Qostanaı baǵytymen qatynap jatqan poıyzda bolǵan. Vagonnyń tehnıkalyq jaǵdaıyna qatysty tekseris júrgizý týraly sheshim qabyldandy. Poıyz óz baǵytynyń sońǵy núktesine jetken soń tehnıkalyq baıqaý júrgiziledi jáne oqıǵanyń mán-jaıy anyqtalady. Eger zańbuzýshylyqtar rastalsa, tasymaldaýshy kompanııanyń kináli tulǵalary jaýapkershilikke tartylady. Mınıstrlik jolaýshylardyń qaýipsizdigi men jaılylyǵyn qamtamasyz etý baǵytynda júıeli jumys júrgizip keledi jáne barlyq tasymaldaýshylardan tehnıkalyq reglamentter men sapa standarttaryn múltiksiz saqtaýdy talap etedi, — delingen Kólik mınıstrliginiń habarlamasynda.
Keıinirek vedomstvoda poıyz vagonynyń naqty qaı kompanııaǵa tıesili ekeni qosymsha naqtylanatyny da habarlandy.
Aıta keteıik, Astanada belgisiz bireýler LRT vagondaryna sýret salyp ketken.