Jańbyr, shańdy daýyl: 24 shildege arnalǵan aýa raıy boljamy usynyldy

ASTANA. KAZINFORM — «Qazgıdromet» RMK 2025 jylǵy 24 shildege arnalǵan aýa raıy boljamyn jarııalady.

— Soltústik-batys tsıklon jáne onymen baılanysty atmosferalyq frontaldi bólikter elimizdiń basym bóliginde jańbyr men naızaǵaı ákeledi. Batys pen soltústik-batys óńirlerde qatty jańbyr jaýýy múmkin, keı jerde burshaq jaýýy yqtımal. Tek elimizdiń ońtústigi men shyǵysynda antıtsıklon yqpaly saqtalyp, jaýyn-shashynsyz aýa raıy saqtalady. Respýblıka boıynsha jeldiń kúsheıýi kútiledi, al batys pen ońtústikte shańdy daýyl soǵýy múmkin, — delingen habarlamada.

Mańǵystaý oblysynda kúndiz 38–39 gradýs aptap ystyq bolady. Jetisý jáne Almaty oblystarynda 35–37 gradýs, Jambylda 38 gradýs, Túrkistanda 40–42 gradýs, Qyzylordada 40–43 gradýs, Ulytaýda 35–39 gradýs, Qaraǵandyda 35 gradýsqa deıin qatty ystyq kútiledi. Sondaı-aq Atyraý oblysynyń batysynda, Qostanaı men Aqtóbe oblystarynyń ońtústiginde de 35 gradýsqa deıin ystyq bolady.

Órt qaýpi joǵary aımaqtar 

Shyǵys Qazaqstan, Abaı oblystarynda, Qostanaı oblysynyń batysy men shyǵysynda, Qaraǵandy oblysynyń soltústigi men ortalyǵynda, Atyraý oblysynyń batysy men ońtústiginde, Aqmola oblysynyń shyǵysy men ońtústiginde, Pavlodar oblysynyń batysy, shyǵysy jáne ońtústiginde joǵary órt qaýpi saqtalady.

Al Mańǵystaý, Qyzylorda, Túrkistan, Almaty, Jambyl, Jetisý, Ulytaý oblystarynda, sondaı-aq Atyraý oblysynyń soltústigi men ońtústiginde, Qaraǵandy oblysynyń batysy, ońtústigi jáne shyǵysynda, Aqtóbe oblysynyń ortalyǵy men ońtústiginde, Batys Qazaqstan oblysynyń shyǵysynda, Qostanaı oblysynyń ońtústiginde jáne Abaı oblysynyń ońtústigi men soltústik-batysynda tótenshe órt qaýpi boljanyp otyr.

Buǵan deıin sınoptıkter 24-26 shilde aralyǵyndaǵy aýa raıy boljamyn jarııalaǵanyn jazǵan edik.