Jańbyr, naızaǵaı, daýyl: 23 mamyrda aýa raıy qandaı bolady

ASTANA. KAZINFORM – Elimizdiń basym bóligine atmosferalyq frontaldy bólikter áser etedi.

Qazgıdromet sınoptıkteriniń boljamy boıynsha, 23 mamyrda atmosferalyq fronttardyń áserinen respýblıkanyń basym bóliginde turaqsyz aýa raıy saqtalady, jańbyr jaýyp, naızaǵaı oınap, daýyl bolady. Elimizdiń soltústiginde, shyǵysynda burshaq jaýady, túngi saǵattarda Almaty oblysynyń taýly aýdandarynda jaýyn-shashyn (jańbyr, qar) jaýady. Respýblıka boıynsha jeldiń kúsheıýi, soltústik-batysta, soltústikte tuman kútiledi.

Qostanaı oblysynyń ońtústiginde, Atyraý oblysynyń soltústik-batysynda, Qyzylorda oblysynyń shyǵysynda, Batys Qazaqstan oblysynyń soltústik-batysynda, Shyǵys Qazaqstan oblysynyń ońtústik-shyǵysynda, Abaı oblysynyń ortalyǵynda joǵary órt qaýipi saqtalady.

Abaı oblysynyń ońtústiginde, Túrkistan oblysynyń shóldi aýdandarynda tótenshe órt qaýipi kútiledi.