Jańbyr, burshaq, jel: 19 mamyrǵa arnalǵan aýa raıy boljamy

ASTANA. KAZINFORM – Elimizdiń basym bóligine ońtústik tsıklon jáne onymen baılanysty atmosferalyq frontaldy bólikter áser etedi.

Qazgıdromet sınoptıkteriniń boljamy boıynsha, 19 mamyrda elimizdiń basym bóliginde jańbyr jaýyp, naızaǵaı oınaıdy. Soltústik-batysta, soltústikte, ońtústikte, ońtústik-shyǵysta, respýblıkanyń ortalyǵynda kún kúrkireıdi, jańbyr, burshaq jaýady.

Respýblıka boıynsha shańdy daýyl turyp, jel kúsheıedi. Elimizdiń ońtústiginde jel soǵady, soltústik-batys pen soltústikte tuman túsedi.

Qaraǵandy ​​oblysynyń ortalyǵynda, ońtústiginde, Ulytaý oblysynyń ortalyǵynda, Qostanaı oblysynyń ońtústiginde, Shyǵys Qazaqstan oblysynyń ońtústik-shyǵysynda, soltústiginde, shyǵysynda, Qyzylorda oblysynyń ortalyǵynda, batysynda, Batys Qazaqstan oblysynyń ortalyǵynda, Túrkistan oblysynyń shóleıt aımaqtarynda joǵary órt qaýpi bar.

Abaı oblysynyń ońtústiginde, Úrjar aýdanynda, Jetisý oblysynyń shyǵysynda tótenshe órt qaýpi bar.